Premyer Liqanın XVII turunda…

Azərbaycan Premyer Liqasının cari mövsümünün yeni bombardiri müəyyənləşib.Azərtac xəbər verir ki, bu, “Qəbələ”nin futbolçusu Filip Ozobiçdir. Xorvatiya milli komandasının da üzvü olan təcrübəli yarımmüdafiəçi həm Premyer Liqanın XVII turunda AZAL ilə oyunda etdiyi dublla 2:0 hesablı qələbədə pay sahibi olub, həm də bombardirlər yarışında vahid liderliyə yüksəlib. Fransalı komanda yoldaşı Baqali Dabo (7 qol) ilə bunadək şərikli lider olan Ozobiç artıq 9 qolla onu qabaqlayaraq birinci pillədə qərarlaşıb. Bu, eyni zamanda 26 yaşlı yarımmüdafiəçinin Azərbaycandakı yarımillik karyerasında ilk dublu olub.Qeyd edək ki, 1992-ci ildən keçirilən Azərbaycan çempionatlarında indiyədək nə “Qəbələ”dən bombardir, nə də xorvatiyalı futbolçu ən sərrast oyunçu olub.xeber100.com

TASS informasiya agentliyinin məlumatı

Sankt-Peterburq Olimpiya paytaxtı olmağa layıqdır və 2028-ci ildə Yay Olimpiya Oyunlarına ev sahibliyi edə bilər. Bu barədə TASS-a sözügedən şəhərin qubernatoru Qeorqiy Poltavçenko məlumat verib:“Mən 90-cı illərdə Sankt-Peterburqun 2004-cü il Olimpiya Oyunları üçün namizədliyini yaxşı xatırlayıram. Şübhə etmirəm ki, o vaxt kimi indi də bizim şəhər Olimpiya paytaxtı olmaq adına layiqdir. Əgər bütün ölkə və Rusiya Olimpiya Komitəsi Sankt-Peterburqun namizədliyini təsdiqləyərsə, biz öz tərəfimizdən nə lazımdısa edəcəyik”, - deyə qubernator əlavə edib.xeber100.com

UEFA Çempionlar Liqasının final mərhələsi…

Avropanın ən nüfuzlu klub turniri olan UEFA Çempionlar Liqasının səkkizdəbir final mərhələsinin ilk görüşləri fevralın 14-15-də keçiriləcək. Bu mərhələdə cavab qarşılaşmaları isə bir həftə sonra – fevralın 21-də və 22-də oynanılacaq.Azərtac xəbər verir ki, UEFA qitənin ən nüfuzlu klub turnirinin səkkizdəbir final mərhələləri ilə bağlı maraqlı statistika açıqlayıb.UEFA Çempionlar Liqasının tarixində səkkizdəbir final mərhələlərində ən çox oyun keçirən futbolçu Kriştiano Ronaldodur. Portuqaliyalı futbolçu indiyədək 24 qarşılaşmada meydana çıxıb. Onu 23 oyunla Zlatan İbrahimoviç, hər birinin aktivində 22 matç olan İker Kasilyas və Lionel Messi izləyirlər.Dünyanın ən güclü iki futbolçusu hesab edilən Kriştiano Ronaldo ilə Lionel Messi arasındakı rəqabət bu statistikada da özünü göstərib. Belə ki, səkkizdəbir final mərhələlərində ən çox qol vuran futbolçu Lionel Messidir. Aktivində 20 qol olan argentinalı bu göstərici üzrə portuqaliyalı rəqibini üç top qabaqlayır.xeber100.com

Həndbol Federasiyasının məlumatına görə…

Azərbaycan Həndbol Federasiyası (AHF) loqotipini yeniləyib.AHF-dən Azərtac-a verilən xəbərə görə, federasiyanın loqotipi bundan sonra ay və ulduz əks olunan formada deyil, alov şəklində olacaq. Üzərində həndbolçu silüeti olan top federasiyanın həndbol idmanına aid olmağını vurğulayır. Topu bürüyən alov loqotipi daha əzəmətli göstərir. Yeni loqotipdə Azərbaycanın dövlət bayrağının rənglərinin əks olunması milli dəyərlərə bağlılığın simvoludur.Loqotipin təqdimatı federasiyanın yaxın günlərdə köçəcəyi “SDN” Biznes Mərkəzində planlaşdırılır.xeber100.com

“Böyük dəbilqə” beynəlxalq turniri keçiriləcək

Fevralın 11-12-də Parisdə ACCORHOTELS Arenada cüdo üzrə “Böyük dəbilqə” beynəlxalq turniri keçiriləcək. Turnirdə 63 ölkədən 459 cüdoçu birincilik uğrunda mübarizə aparacaq.Ölkəmizi turnirdə təmsil edəcək milli komandamızın üzvləri məlum olub: Elxan Səfərov (60 kq), Nicat Şıxəlizadə (66 kq), Rüstəm Orucov (73 kq), Hidayət Heydərov (73 kq), Məmmədəli Mehdiyev (90 kq), Elmar Qasımov (100 kq), Elxan Məmmədov (100 kq) və Uşangi Kokauri (100 kq-dan yuxarı).Qeyd edək ki, növbəti “Böyük dəbilqə” turniri martın 10-12-də Bakıda keçiriləcək.xeber100.com

“Grassroots” proqramı çərçivəsində təqdimat mərasimi keçirilib

Fevralın 8-də Azərbaycan İslam Həmrəyliyi Oyunları Əməliyyat Komitəsi (AİHOƏK) “Grassroots” proqramı çərçivəsində təqdimat mərasimi keçirib. Mərasimdə IV İslam Həmrəyliyi Oyunlarının idmançı və ulduz səfirləri təqdim olunub.Azərtac xəbər verir ki, AİHOƏK-in korporativ direktoru E.Səfərov IV İslam Həmrəyliyi Oyunlarına 100 gündən az bir vaxt qaldığı dövrdə idmançı və ulduz səfirlərin ictimaiyyətə təqdim olunmasını əlamətdar hadisə kimi qiymətləndirib.Qeyd olunub ki, IV İslam Həmrəyliyi Oyunlarının sıralarına bu gündən etibarən ulduz və idmançı səfirlər qismində qatılacaq məşhurlarımız idmanın yeniyetmə və gənclər arasında daha da kütləviləşməsinə, ictimaiyyətin IV İslam Həmrəyliyi Oyunlarına marağının artırılmasına mühüm töhfə verəcəklər.“Grassroots” proqramı idmançı və ulduz səfirlər vasitəsilə ictimaiyyətə təqdim olunub. IV İslam Həmrəyliyi Oyunlarının səfiri olaraq seçilmiş ulduzlar və idmançılar Oyunların təbliğində fəallıq göstərəcək, gerisayım tədbirlərində iştirak edəcək, müxtəlif sosial kampaniyaları dəstəkləyəcək və özlərinin sosial media kanallarından istifadə edərək bu mühüm idman yarışının təbliğinə dəstək göstərəcəklər.AİHOƏK rəsmilərinin çıxışlarından sonra idmançı və ulduz səfirlər ictimaiyyətə təqdim edilib.xeber100.com          

Azərbaycan–Şimali İrlandiya oyununun stadionu müəyyənləşib

2018-ci ildə Rusiyada təşkil olunacaq futbol üzrə dünya çempionatının seçmə mərhələsi çərçivəsində keçiriləcək Azərbaycan–Şimali İrlandiya oyununun stadionu müəyyənləşib.Azərtac AFFA-ya istinadla xəbər verir ki, iyunun 10-da saat 20:00-da başlayacaq qarşılaşma “Bakcell Arena”da keçiriləcək.xeber100.com

Güləş üzrə dünya kuboku yarışları keçiriləcək

Fevralın 16-17-də İran İslam Respublikasının Kirmanşah şəhərində sərbəst güləş üzrə dünya kuboku yarışları keçiriləcək. Fevralın 6-da Dünya Güləş Birliyinin prezidenti Nenad Laloviçin iştirakı ilə yarışın püşkatma mərasimi keçirilib.Azərtac xəbər verir ki, yığma komandamız Rusiya, Gürcüstan və ABŞ idmançıları ilə “A” yarımqrupunda mübarizə aparacaq. İran, Türkiyə, Hindistan və Monqolustan komandaları isə “B” yarımqrupunda yarışacaqlar.Fevralın 16-da yarımqrup, bir gün sonra isə final görüşləri keçiriləcək.Ötən il keçirilən analoji yarışda sərbəst güləşçilərimiz yarışları 5-ci yerdə başa vurub. Buna qədər isə sərbəst güləşçilərimiz iki dəfə - 2004-cü və 2009-cu illərdə dünya kubokunun sahibi olub.xeber100.com

Futbol üzrə dünya çempionatına hazırlıq xərcləri artırılıb

2018-ci ildə Rusiyada keçiriləcək futbol üzrə dünya çempionatına hazırlıq xərcləri artırılıb.Azərtac xəbər verir ki, turnirin büdcəsinə 19,1 milyard rubl (323 milyon 813 min 515 dollar) əlavə olunub.Rusiya hökumətinin hüquqi informasiya portalında yer alan xəbərdə qeyd olunur ki, xərclər 619 milyard 670,5 milyondan 638 milyard 842,6 milyon rubla qədər artırılıb.Qeyd edək ki, “DÇ-2018”in oyunları 14 iyundan 15 iyuladək Rusiyanın 11 şəhərində keçiriləcək.xeber100.com

İdman Sarayında keçirilən çempionata yekun vurulub

Bakı İdman Sarayında keçirilən kikboksinq üzrə respublika çempionatına yekun vurulub.Azərtac xəbər verir ki, həm gənclər, həm də böyüklər arasında keçirilən yarışda 40 komandanın heyətində 200-dək idmançı iştirak edib. Böyüklər arasında keçirilən turnirdə 12 çəki dərəcəsində qalib və mükafatçılar müəyyənləşib. Daxili İşlər Nazirliyinin idman cəmiyyətinin atletləri çempionatda daha yaxşı çıxış ediblər.Yarışın qalibləri kikboksinq üzrə yığma komandanın təlim-məşq toplanışlarına cəlb olunacaqlar. Əlavə hazırlıq və sınaqlardan sonra seçmə kollektivin üzvləri müəyyənləşəcək və onlar 2017-ci ildə keçiləcək mötəbər yarışlarda Azərbaycanı təmsil edəcəklər.xeber100.com