Beynəlxalq Bank güzəştli kampaniyaya start verib

"Azərbaycan Beynəlxalq Bankı" Novruz bayramı münasibətilə martın 13-dən 31-dək iki güzəştli kampaniyaya start verib.Bankdan Azərtac-a bildiriblər ki, bunlardan birincisi depozitlərlə bağlıdır. Kampaniya müddətində bankda manat depoziti yerləşdirən müştərilərin illik depozit faizlərinə 1 faiz əlavə olunacaq. "Azərbaycan Beynəlxalq Bankı"nda depozit yerləşdirən müştərilərə ödəniş kartları hədiyyə edilir və depozitin müəyyən həcmində kredit əldə etmək imkanı da yaradılır.Bankın eyni müddətdə həyata keçirdiyi digər bir kampaniya isə "VISA" və "MasterCard Gold" və "Platinum" kartlarını 50 faiz endirimlə əldə etmək fürsəti verir. Belə ki, müştərilər kampaniya ərzində "Gold" kartlarını cəmi 15, "Platinum" kartlarını isə 25 manata əldə edə bilərlər. Kart sahibləri üçün "MobilBank" və "İnternetBank" tam pulsuzdur.xeber100.com

Əmlak Məsələləri Dövlət Komitəsinin məlumatı

Əmlak Məsələləri Dövlət Komitəsi tərəfindən hər həftə intensiv olaraq keçirilən açıq hərraclar vasitəsilə dövlət əmlaklarının özəlləşdirilməsi ölkəyə investisiya cəlb olunması baxımından mühüm əhəmiyyət daşıyır. Belə ki, paytaxt ilə yanaşı respublikanın müxtəlif şəhər və rayonlarında müxtəlif növ daşınmaz dövlət əmlakları hərrac vasitəsilə potensial investorlara təklif olunur.Komitənin mətbuat xidmətindən Azərtac-a bildirilib ki, növbəti belə hərrac martın 14-də keçirilib.Hərracda 2 kiçik dövlət müəssisə və obyekti, 3 istifadəsiz qeyri-yaşayış sahəsi və 5 nəqliyyat vasitəsi özəlləşdirilib. Özəlləşdirilmiş kiçik dövlət müəssisələri və istifadəsiz qeyri-yaşayış sahəsi paytaxtda və respublikanın digər regionlarında yerləşir.Qeyd olunub ki, hərracda ən yüksək qiymətə özəlləşdirilən əmlak Gədəbəy şəhərində yerləşən “Xəstəxana binasının yarımçıq tikilisi” olub. Belə ki, bu əmlak 70 min manata özəlləşdirilib. Özəlləşdirilmiş 3 istifadəsiz qeyri-yaşayış obyektinin biri paytaxtın Nərimanov rayonunda, ikisi isə müvafiq olaraq regionlarda - Gəncə və Mingəçevir şəhərlərində yerləşir.xeber100.com

Əməkdaşlıq haqqında memorandum imzalanıb

Martın 14-də "Azlntelecom" Məhdud Məsuliyyətli Cəmiyyətində (MMC) Nəqliyyat, Rabitə və Yüksək Texnologiyalar Nazirliyi "Azərpoçt" MMC-nin itirilmiş sənədlərin tapılaraq sahibinə qaytarılmasına xidmət edən "Poçtap" sosial layihəsi çərçivəsində 5 qurum arasında əməkdaşlıq haqqında memorandum imzalanıb.Azərtac xəbər verir ki, memorandum Bakı Şəhər Baş Polis İdarəsi, “Bakı Metropoliteni” Qapalı Səhmdar Cəmiyyəti, "Təmiz Şəhər" Açıq Səhmdar Cəmiyyəti, "BakuBus" MMC və Azərpoçt" MMC arasında imzalanıb.Sənədə əsasən, həmin qurumlar "Poçtap" xidmətini dəstəkləmək, daim əlaqəli işləmək, əməkdaşlar tərəfindən tapılan sənədləri poçt inkassasiyasına təhvil vermək, eləcə də vətəndaşları "Poçtap" xidməti barədə məlumatlandırmaq üzrə öhdəliklər götürüblər.“Azərpoçt” MMC-nin direktoru vəzifəsini müvəqqəti icra edən Sübhan Kazımov məlumat verib ki, "Poçtap" xidməti çərçivəsində tapılmış sənədlər poçt müəssisələri və “Şəbəkə” xidmət mərkəzləri tərəfindən qəbul olunur, sahibləri axtarılır, tapıldığı halda sahiblərinə, əks təqdirdə aidiyyəti orqana təslim edilir.xeber100.com

Dövlət Gömrük Komitəsinin vətəndaşlara müraciəti…

Dövlət Gömrük Komitəsi işə qəbulla bağlı vətəndaşlara müraciət edib.Dövlət Gömrük Komitəsinin mətbuat xidmətindən Azərtac-a bildirilib ki, son vaxtlar Dövlət Gömrük Komitəsinə, xüsusən komitə sədri Aydın Əliyevə məktubla, rəsmi qəbul günləri və regionlarda vətəndaşların qəbulu zamanı edilən müraciətlərin əsas hissəsi gömrük orqanlarına işə qəbulla bağlıdır.Xatırladaq ki, gömrük orqanlarına işə qəbul “Gömrük orqanlarında xidmət haqqında” Əsasnamə və Azərbaycan Respublikası Prezidentinin 12 noyabr 2010 tarixli, 349 nömrəli Fərmanı ilə təsdiq edilmiş “Gömrük orqanlarına xidmətə qəbul ilə əlaqədar müsabiqənin keçirilməsi qaydaları” əsasında həyata keçirilir. Gömrük orqanlarının hüquq-mühafizə orqanları statusuna malik olduğunu nəzərə alaraq, qeyd edilən əsasnaməyə uyğun olaraq yaşı 30-u keçməmiş və müvafiq ali təhsilə (gömrük işinin təşkili, hüquqşünaslıq, iqtisadiyyat, maliyyə və s.) malik Azərbaycan Respublikasının vətəndaşları müsabiqədə iştirak edə bilərlər.Dövlət Gömrük Komitəsi gömrük orqanlarında işə qəbulla bağlı müraciət edən vətəndaşlara bir daha bildirir ki, bu barədə komitənin rəsmi internet səhifəsindən ətraflı məlumat əldə etmək mümkündür və həmin məlumatda nəzərdə tutulan kriterilərə uyğun şəxslərin müraciət etməsi tövsiyə olunur.xeber100.com

Bakı-Tbilisi-Bakı marşrutu üzrə aviareyslərin sayı artacaq

“Azərbaycan Hava Yolları” QSC (AZAL) Bakı-Tbilisi-Bakı marşrutu üzrə aviareyslərin sayını artırır.Azərtac xəbər verir ki, bu barədə Gürcüstanın İqtisadiyyat və Dayanıqlı İnkişaf Nazirliyinin Mülki Aviasiya Agentliyinin yaydığı məlumatda bildirilir.Məlumata görə, bununla bağlı müvafiq razılıq əldə edilib. Aviareyslər “Airbus A319” markalı təyyarə ilə yerinə yetiriləcək. Hazırda AZAL qeyd edilən marşrut üzrə həftədə 7 dəfə uçur. Razılığa əsasən martın sonundan etibarən uçuşların sayı 8-ə, mayın 2-dən reyslərin sayı 9-dək, mayın 4-dən isə 10-dək artırılacaq.xeber100.com

“Bank of Baku” yeni kampaniyaya start verib

Novruz bayramı ərəfəsində "Bank of Baku" bayram alış-verişinə hazırlaşan "Bolkart" müştəriləri üçün yeni kampaniyaya start verib.Bankdan Azərtac-a bildiriblər ki, martın 10-dan 20-dək keçirilən kampaniya çərçivəsində bolkartlılar bayram bazarlığını sərfəli şərtlərlə edə biləcəklər. Belə ki, bu dövr ərzində "Bolkart" sahibləri bayram alış-verişlərini rahatlıqla edib, xərcini 1 ay sonra deyil, 2 ay sonra ödəmək imkanı əldə edirlər. Yəni, martda alıb xərcini apreldə deyil, mayda ödəyəcəklər. Novruz kampaniyasından bütün növ "Bolkart" kredit kart sahibləri faydalana bilər.xeber100.com

Əmlak Məsələləri Dövlət Komitəsi yeni hərrac elan edib

Əmlak Məsələləri Dövlət Komitəsi (ƏMDK) tərəfindən aprelin 11-də keçirilməsi nəzərdə tutulan yeni hərrac elan olunub. Bu hərraca, ümumilikdə 158 dövlət əmlakı olmaqla 20 səhmdar cəmiyyət, 96 kiçik dövlət müəssisə və obyekti, 36 istifadəsiz qeyri-yaşayış sahəsi və 6 nəqliyyat vasitəsi çıxarılıb. Komitədən Azərtac-a bildirilib ki, hərrac barədə informasiyalar komitənin rəsmi internet səhifəsi, Özəlləşdirmə portalı (privatization.az) və “facebook” səhifəsində yerləşdirilib. Mütəmadi yenilənən bu internet resursları vasitəsilə həm hərraca çıxarılan, həm də indiyədək hərraclarda satılmış əmlaklar haqqında məlumat almaq olar.Hərracda əmlak sahibi olmaq istəyən vətəndaşın 2 sadə proseduru yerinə yetirməsi kifayətdir. Birinci mərhələdə komitənin elektron xidmətlər portalı vasitəsilə sifariş verilir, ikincidə isə əmlakın satış qiymətinin 10 faizi məbləğində behi ödənilməklə hərracda iştirakçı statusu qazanılır. Sifarişlər hərracın keçirilməsinə 3 bank günü qalanadək verilməlidir.xeber100.com

“Made in Azerbaijan” brendi altında…

Bakı Limanı və onun ətrafında qurulan Azad Ticarət Zonası “Made in Azerbaijan” brendi altında çeşidli istehsalın yaradılmasına zəmin yaradacaq.Azərtac xəbər verir ki, bu barədə “Bakı Beynəlxalq Dəniz Ticarət Limanı” QSC-nin baş direktoru Taleh Ziyadov Türkiyənin “TRT World” kanalının Azərbaycanın neftdən asılılığını azaltmaq siyasətində Bakı Limanının roluna həsr olunan reportajında deyib.O bildirib ki, Azərbaycanın qeyri-neft sektorunun inkişafı üçün ən önəmli layihələrindən biri Ələt qəsəbəsində tikilməkdə olan Bakı Beynəlxalq Dəniz Ticarət Limanı və Azad Ticarət Zonası layihəsidir. Bu layihədən Avropa ölkələri, Türkiyə, Rusiya, Çin və başqaları yararlana biləcək. Bakı həm logistik, həm də ticarət üçün bir hab rolunu oynayacaq.T.Ziyadov qeyd edib ki, bu il birinci fazası yekunlaşan Bakı Limanı və Azad Ticarət Zonası bütün region ölkələrinə xidmət edəcək. Artıq neft erası bitir və Azərbaycan yeni eraya – uzunmüddətli strateji və güclü əhəmiyyəti olan layihələrdən ibarət bir eraya başlayır.xeber100.com

Azərbaycan, Gürcüstan və Türkiyə üzrə yeni regional prezident təyinatı

BP-yə yeni regional prezident təyin olunub.BP-nin mətbuat xidmətindən Azərtac-a bildirilib ki, BP bu gün Qəri Counzu BP-nin Azərbaycan, Gürcüstan və Türkiyə üzrə yeni regional prezidenti təyin edib. Yeni prezident öz vəzifəsinin icrasına bu il aprel ayının 2-dən başlayacaq və BP-nin Bakıdakı ofisində fəaliyyət göstərəcək. Qəri Counz hazırda BP-nin qazma, tamamlama və quyular üzrə qlobal rəhbəridir.Qəri Counz bu vəzifədə BP-nin regiondakı biznesinə 2012-ci ilin noyabr ayından uğurla rəhbərlik edən Qordon Birrelli əvəz edəcək. Qordonun yeni vəzifəsi isə Londonda BP-nin baş ofisində baş əməliyyat rəhbəri olacaq və o, BP-nin hasilat, transformasiya və karbon üzrə işlərinə başçılıq edəcək.BP-nin baş icraçı direktoru Bob Dadli: “Qəri qlobal miqyasda təcrübəli bir neftçi və yetkin bir biznes rəhbəridir. BP-nin dünya üzrə quyularını idarə edən bölümünə uzun müddət başçılıq etmiş bir şəxs kimi o, bu yeni vəzifəyə Xəzərdəki əməliyyatlarımızla bağlı öz dərin texniki bilgilərini gətirir. Qəri BP-nin Rumeyla yatağı və Şimal dənizindəki yataqlar kimi bir sıra çox mühüm biznesini idarə etmişdir. BP Azərbaycanda öz 25 illiyini qeyd etdiyi bir vaxtda bizim qəti niyyətimiz bütün maraqlı tərəflərlə daha da sıx əməkdaşlıq vasitəsilə regiondakı biznesimizin uğurunu davam etdirməkdir. BP-nin yeni regional prezidenti kimi Qəri bizim uğurlu tərəfdaşlığımızı BP-nin burada idarə etdiyi bütün layihələrdəki böyük nailiyyətlərin üzərində quraraq davam etdirəcək.xeber100.com

“CaspianAgro 2017” sərgisi keçiriləcək

Mayın 17-dən 19-dək Bakı şəhərində kənd təsərrüfatı və qida məhsullarının nəhəng regional forumu – XI Azərbaycan Beynəlxalq Kənd Təsərrüfatı “CaspianAgro 2017” sərgisi keçiriləcək.Iteca Caspian şirkətindən Azərtac-a bildirilib ki, sərgi Azərbaycanda İxracın və İnvestisiyaların Təşviqi Fondu (AZPROMO) və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) tərəfindən dəstəklənir. Sərginin təşkilatçısı qismində isə “Caspian Event Organisers” (“CEO”) şirkəti çıxış edir. “CaspianAgro 2017” sərgisinin qeydiyyat üzrə sponsoru “Grand Motors” (Azərbaycan) şirkətidir.Qeyd olunub ki, “CaspianAgro 2017” sərgisində Azərbaycan, Belarus, Çin, İtaliya, Rusiya, Şri-Lanka, Türkiyə və digər ölkələri təmsil edən kənd təsərrüfatı məhsul və avadanlıqlarının istehsalçı və distribüterləri iştirak edəcəklər.xeber100.com