Bakı Fond Birjasında hərrac keçiriləcək

Fevralın 8-də Bakı Fond Birjasında (BFB) Azərbaycan Respublikasının Mərkəzi Bankının qısamüddətli notlarının yerləşdirilməsi üzrə hərrac keçiriləcək.BFB-dan Azərtac-a bildiriblər ki, hərrac zamanı sifarişlərin toplanması BFB-nin ticarət reqlamentinə uyğun olaraq saat 11:00-dan 12:30-dək həyata keçiriləcək. Hərraca çıxarılan notların həcmi 50 milyon manat, bir notun nominal dəyəri 100 manat, tədavül müddəti 29 gündür. Notlar 2017-ci il martın 9–da ödəniləcək.Mərkəzi Bankın qısamüddətli notların buraxılışı, yerləşdirilməsi və tədavülü haqqında qaydalara əsasən hərraclarda bank lisenziyasına malik olan hüquqi şəxslər iştirak edə bilər. Banklar birjada BFB-nin üzvü olan investisiya şirkətləri vasitəsilə iştirak edə bilər. Hər bir bank tərəfindən təqdim edilən sifarişlərin ümumi sayı (rəqabətli və qeyri-rəqabətli) 3-dən artıq olmamalıdır.Hərrac zamanı, notların buraxılışının 20 faizdən artıq olmamaq şərtilə qeyri-rəqabətli sifarişlərin qəbul edilməsinə icazə verilir.xeber100.com

2017-ci ilin tədbirlər planı təsdiqlənib

“Caspian European Club” (“Caspian Business Club”) və “Caspian American Club”un İdarə Heyəti tərəfindən 2017-ci ilin tədbirlər planı təsdiqlənib.Bu barədə Azərtac-a “Caspian European Club” və “Caspian American Club”un sədrinin birinci müavini və baş icraçı direktoru T.Əliyev məlumat verib.O deyib ki, təsdiqlənmiş proqrama müvafiq olaraq, hər ayın üçüncü çərşənbə günü CEO Lunch keçiriləcək. CEO Lunch çərçivəsində hökumətin iqtisadi blokunu təmsil edən dövlət qurumlarının başçıları, diplomatik nümayəndəliklərin rəhbərləri, CEİBC-nin üzv şirkətlərinin top-menecerləri arasında qeyri-rəsmi ünsiyyət təşkil olunacaq. İlk CEO Lunch fevralın 15-də keçiriləcək.xeber100.com

İran Milli Neft Şirkətinin məlumatı

İranda ümumilikdə 15 milyard barrel həcmində ehtiyatı olan yeni neft yatağı kəşf edilib.İran Milli Neft Şirkətinə (NIOC) xəbər verir ki, yatağın çıxarıla bilən ehtiyatı isə 2 milyard barreldir.xeber100.com  

Neft Fondunun iştirakı ilə valyuta hərracı keçirilib

Fevralın 7-də Mərkəzi Bankda valyuta hərracı keçirilib.Bankdan Azərtac-a verilən məlumata görə, Dövlət Neft Fondunun iştirakı ilə keçirilən hərracın və həmin vaxtadək banklararası bazarda aparılan əməliyyatların nəticəsində manatın orta çəkili məzənnəsi 1,8251 səviyyəsində formalaşıb.xeber100.com

“Trans-Adriatik” layihəsinə sərmayə qoyuluşu 400 milyon avro olacaq

Bu il Albaniyada Azərbaycan təbii qazının Avropaya nəqlini nəzərdə tutan “Trans-Adriatik” (TAP) qaz boru kəməri layihəsinə sərmayə qoyuluşu 400 milyon avro ətrafında olacaq.Azərtac “worldbulletin.net”ə istinadla xəbər verir ki, bu barədə TAP-ın Albaniya üzrə baş direktoru Şkelqim Bozqo deyib.“Layihəyə yatırılan investisiyalar Albaniyanın ÜDM-inin 4 faizinə bərabər olacaq. TAP qaz kəməri Albaniya iqtisadiyyatında həyata keçirilən ən böyük layihədir. Layihəyə investisiya qoyuluşu gələn il ərzində də eyni miqdarda saxlanılacaq və ümumilikdə TAP-ın Albaniya hissəsi 1,5 milyard avroya başa gələcək”, - deyə Ş.Bozqo əlavə edib.Qeyd edək ki, TAP kəməri marşrutu üzrə Albaniyada 54 kilometr ərazi təmizlənib, 50 kilometr borular xətt boyunca düzülüb, boruların 40 kilometri qaynaq edilib. Təxminən 28 kilometr borular isə qaynaqlandıqdan sonra torpaq altına basdırılıb. İndiyədək Albaniyada boru kəməri marşrutu boyunca ərazinin 25 faizdən çoxu təmizlənib. TAP-ın 215 kilometrdən çox Albaniya hissəsinin inşasında istifadə ediləcək 13 min borunun indiyədək təxminən 8 min 450-si (65 faizi) tikinti sahələrinə təhvil verilib. Albaniyada giriş yollarının və körpülərin modernləşdirilməsinin birinci mərhələsi başa çatıb. Bu mərhələdə təxminən 58 kilometr yolların, iki yeni körpünün tikintisi və 40 körpünün isə əsaslı təmiri, modernləşdirilməsi həyata keçirilib. Hazırda TAP üzrə Albaniyada 1800 nəfər işlərə cəlb edilib.xeber100.com

Dünya birjalarında neftin qiyməti…

Dünya birjalarında neftin qiyməti bahalaşmaqda davam edir.Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,17 dollar bahalaşaraq 54 dollar, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti isə 0,16 dollar artaraq 56,97 dollar olub.xeber100.com

Əmlak Məsələləri Dövlət Komitəsi hərrac keçirəcək

Əmlak Məsələləri Dövlət Komitəsi (ƏMDK) tərəfindən martın 7-də keçiriləcək hərraca 78 dövlət əmlakı çıxarılıb. Həmin əmlakların 17-si kiçik dövlət müəssisəsi, 21-i səhmdar cəmiyyət, 36-sı isə istifadəsiz qeyri-yaşayış sahəsidir. Hərraca, həmçinin ləğv edilmiş “Azərxalça” Elmi Yaradıcılıq İstehsalat Birliyinin regionlarda yerləşən 4 əmlakı da çıxarılıb. Həmin əmlaklara Hacıqabulda yerləşən “Hacıqabul sahəsinin əmlak kompleksi”, Lerikdə yerləşən “Lerik xalça sexinin əmlak kompleksi” və digərləri daxildir. Özəlləşməyə çıxarılan səhmdar cəmiyyətləri əsasən tikinti, sənaye, nəqliyyat, inşaat sahələrinə aiddir. Paytaxt və regionlarda yerləşən belə iri müəssisələr sırasına «Salyan Kəndkimya», «Sabirabad Mexanikləşdirmə», «Xəzər Avtonəqliyyat» kimi səhmdar cəmiyyətlər daxildir.xeber100.com

“Petkim” neft-kimya holdinqi iki mükafata layiq görülüb

“Petkim PetroKimya Holding A.Ş.” Türkiyənin Egey bölgəsinin İxracatçı Birlikləri təşkilatının iki mükafatına layiq görülüb. Türkiyə KİV-ləri xəbər verir ki, regionun ən böyük ixracatçısı olan, Türkiyənin ilk və yeganə neft-kimya müəssisəsi “Petkim” “Egey bölgəsinin ən çox ixrac həyata keçirən şirkəti” və “Kimya sektorunun ən çox ixrac həyata keçirən birinci şirkəti” mükafatlarını alıb. “Petkim” birinci mükafatı 2016-cı ildə həyata keçirdiyi 438 milyon dollarlıq ixraca görə, ikinci mükafatı isə Egey İxracatçı Birlikləri üzvlərinin qiymətləndirməsi əsasında qazanıb.Türkiyənin iqtisadiyyat naziri Nihat Zeybekçi mükafatları “Petkim” neft-kimya holdinqinin icraçı direktoru Anar Məmmədova təqdim edib.A.Məmmədov deyib ki, “Petkim” neft-kimya kompleksində 60 növdə məhsul istehsal edilir, bu məhsullar 50-dən çox ölkəyə ixrac olunur.Qeyd edək ki, SOCAR “Petkim”i 2008-ci ildə 2,5 milyard dollara alıb. SOCAR 2008-ci ilin mayından etibarən Türkiyədəki fəaliyyətini “SOCAR Turkey Enerji A.Ş.” (STEAŞ) adı ilə davam etdirir. STEAŞ “Petkim”də təxminən 52,32 faizlik səhmə sahibdir.xeber100.com

SOCAR-ın məlumatına əsasən…

2017-ci ilin yanvar ayı ərzində Bakı-Tbilisi-Ceyhan əsas ixrac boru kəməri (BTC) vasitəsilə 2 milyon 412 min 263 ton Azərbaycan nefti nəql edilib.SOCAR-ın mətbuat xidmətindən Azərtac-a bildirilib ki, ümumiyyətlə, kəmər istifadəyə verilən gündən 2017-ci il fevral ayının 1-dək BTC-yə 323 milyon 950 min 325 ton neft vurulub.Bundan başqa, 2017-ci ilin yanvar ayında BTC kəməri ilə 935 min 880 ton Türkmənistan nefti nəql olunub.xeber100.com  

Mərkəzi Bank depozit hərracı keçirəcək

Fevralın 6-da Mərkəzi Bank tərəfindən vəsaitlərin cəlb edilməsi üzrə depozit hərracı keçiriləcək.Bankdan Azərtac-a bildiriblər ki, dolayı hərracda 150 milyon manat vəsaitin cəlbi nəzərdə tutulur. Depozit hərracının müddəti 14 gündür.“Bloomberg" ticarət sistemində keçiriləcək hərrac üzrə faiz dərəcələri 12,01-14,99 faiz təşkil edir.xeber100.com