“Varlığın canlanması” adlı fərdi sərgi açılacaq

Oktyabrın 28-də Heydər Əliyev Mərkəzində tanınmış meksikalı rəssam və heykəltəraş Xorxe Marinin “Varlığın canlanması” adlı fərdi sərgisi açılacaq. Azərtac xəbər verir ki, ekspozisiyada sənətkarın son illərdə yaratdığı monumental əsərlər nümayiş olunacaq. Bu, Xorxe Marinin Şərqi Avropa regionunda ilk sərgisidir. “Varlığın canlanması” adlı sərgi bir-birindən fərqlənən üç hissədən ibarətdir: “İnsan cəmiyyətdə”, “İnsan kosmosda” və “İnsan bir cisim və şüur kimi”. Sərginin adı sənətkarın şəxsi inkişafını, “özü”nü parçalayıb və sonradan tamaşaçıların Xorxe Marinin Heydər Əliyev Mərkəzindəki bürünc heykəlləri ilə canlı ünsiyyəti nəticəsində yenidən yığılmasını əks etdirir.xeber100.com

47-ci Hindistan Beynəlxalq Film Festivalı keçiriləcək

“İçəri şəhər” tammetrajlı bədii filmi 47-ci Hindistan Beynəlxalq Film Festivalına dəvət alıb. Cəfər Cabbarlı adına “Azərbaycanfilm” kinostudiyasından bildirilib ki, festival noyabrın 20-dən 28-dək Qoada keçiriləcək. Film Mədəniyyət və Turizm Nazirliyinin dəstəyi ilə “Azərbaycanfilm” kinostudiyasında lentə alınıb. Ekran əsərinin ideya müəllifi Təhminə Rafaella, ssenari müəllifləri Təhminə Rafaella və İlqar Safat, quruluşçu rejissoru İlqar Safat, quruluşçu operatoru Luka Koassin, quruluşçu rəssamı Bütünay Haqverdiyev, icraçı prodüseri Ülvi Qasımov, prodüseri Müşfiq Hətəmovdur. Filmdə baş rolları Təhminə Rafaella, Firdovsi Atakişiyev, Mehriban Zəki, Elmira Şabanova və digərləri canlandırıblar. Qeyd edək ki, “İçəri şəhər” 35-ci Qahirə Beynəlxalq Film Festivalı və 5-ci Van gölü Beynəlxalq Film Festivalında da nümayiş olunacaq.xeber100.com

Opera ulduzları “Karmen” operasında çıxış edəcəklər

Noyabrın 12-də  Azərbaycan Dövlət Akademik Opera və Balet Teatrında Jorj Bizenin "Karmen" operasının tamaşası keçiriləcəkdir. Teatrın rəhbərliyi Karmen partiyasını ifa etmək üçün Polşanın Vroslav Opera Teatrının aparıcı solisti İrina Jitinskanı dəvət etmişdir. Noyabrın 12-də keçiriləcək tamaşaya həmçinin Rusiya Akademik Böyük Teatrının aparıcı solisti Elçin Əzizov (Eskamilio) və Ukrayna Milli Operasının solisti Andrey Romanenko da (Xoze) dəvət olunub. Tamaşada Azərbaycan Dövlət Akademik Opera və Balet Teatrının aparıcı solistləri - Xalq Artisti Əli Əsgərov (Suniqo), Əməkdar Artistlər İnarə Babayeva (Mikaela), Gülnaz İsmayılova (Fraskita), Səbinə Əsədova (Mersedes), solistlər Tural Ağasıyev (Dankayro) və Əliəhməd İbrahimov (Romendado) da çıxış edəcəklər. Tamaşanın dirijoru  beynəlxalq müsabiqələr laureatı Əyyub Quliyevdir.xeber100.com

Rus Dram Teatrının noyabr repertuarı…

Səməd Vurğun adına Azərbaycan Dövlət Rus Dram Teatrı noyabr repertuarını açıqlayıb. Azərtac teatrın repertuarını təqdim edir: 3 noyabr – “Yalan detektoru” 4 noyabr - “Yeni il gecəsində məhəbbət intriqaları” 5 noyabr – “Məhəbbətlə zarafat etmirlər” 6 noyabr - “Həddindən artıq evli taksi sürücüsü” 7 noyabr - “Yay gecəsində yuxu” 8 noyabr - “Büllur sarayda” 9 noyabr - “Şəhrizadın daha bir gecəsi” 11 noyabr - “Artistin taleyi” 12 noyabr – “Qurdlar və qoyunlar” 13 noyabr - “Kazanova: sevgi dərsləri” 17-18 noyabr – “Evlənmə” (V.Mayakovski adına Moskva Akademik Teatrının təqdimatında) 19-20 noyabr – “Rus romanı” (V.Mayakovski adına Moskva Akademik Teatrının təqdimatında) 24 noyabr - “Karamazov qardaşları” 25 noyabr - “Bliss ailəsi” 26 noyabr - “Xalam bundu” (premyera) 27 noyabr - “Afina axşamları”. Uşaqlar üçün: 5 noyabr – “Durna balığının buyruğu ilə” 6 noyabr - “Çar Saltan, knyaz Qvidon və Qu quşu şahzadəsi haqqında nağıl” 12 noyabr - “Maşa və ayı” 13 noyabr - “Anam, atam və mən!” 26 noyabr - “Gəlin, nağıla baxaq” 27 noyabr - “Güləbətin tikən qız və süpürgəçi”. Böyüklər üçün tamaşalar saat 19:00-da, uşaqlar üçün tamaşalar isə saat 12:00-da başlanır.xeber100.com

Caz Festivalına həsr olunmuş rəsm sərgisi açılıb

Oktyabrın 22-də Bakıda tanınmış rəssam Vüqar Əlinin rəsm əsərlərindən ibarət “Jazz Colors” adlı rəsm sərgisi açılıb. Azərtac xəbər verir ki, “Landmark Rotunda”da açılan sərgi Mədəniyyət və Turizm Nazirliyinin və Azərbaycan Mədəniyyət Fondunun birgə təşkilatçılığı ilə Bakıda keçirilən ənənəvi Beynəlxalq Caz Festivalı çərçivəsində reallaşdırılıb. Sərgidə fırça ustasının caz musiqisinə həsr edilmiş sənət əsərləri nümayiş olunur. Bu əsərlərin əksəriyyəti monumental üslublu rəngkarlıq janrındadır. Rəssamın Avropa və rus boyakarlığından ilhamlanaraq yaratdığı “Bass Monster”, “Clarinetist”, “Dexter”, “Drums solo”, “Ella”, “Jazz or Mugham”, “Piro”, “Sory, goodbye”, “Reincarnation” və digər əsərləri mücərrəd rəng çırpılma üslubu ilə sintez edilib.Rəssamın sərginin ekspozisiyasında nümayiş olunan 26-dək əl işi paytaxt sakinləri və şəhərimizin əcnəbi qonaqları tərəfindən maraqla qarşılanıb. Daha sonra tədbir Almaniyanın məşhur caz ifaçısı Vadim Abramov tərəfindən təqdim olunan musiqi nömrələrindən ibarət konsert proqramı ilə davam edib.xeber100.com

Nizami Kino Mərkəzi təqdim edir

Nizami Kino Mərkəzində ABŞ istehsalı olan “Cek Riçer 2” bədii, “Kubo. Samuray əfsanəsi” animasiya filmlərinin və yumor ustası Fərda Aminin “Selfinaz”ının nümayişi başlanıb. Mərkəzin mətbuat xidmətindən Azərtac-a bildirilib ki, dünya şöhrətli aktyor Tom Kruzun rol aldığı “Cek Riçer 2” trillerinin rejissoru Edvard Tsvik, ssenari müəllifi Riçard Uenk və Edvard Tsvikdir. Rolları Tom Kruz, Kobi Smolders, Danika Yaroş, Nindja N.Devu, Robert Nepper, Eldis Xoc, Xolt MakKellani, Syu-Linn Ansari, Culiya Xolt və Çeyz Savoy canlandırıblar. “Kubo. Samuray əfsanəsi” animasiya filmini Mark Heymsin ssenarisi əsasında rejissor Trevis Nayt fentezi və macəra janrında çəkib.xeber100.com  

Mədəniyyət və Turizm Nazirliyinin məlumatına görə…

Oktyabrın 22-də Mədəniyyət və Turizm Nazirliyinin təşkilatçılığı ilə Frankfurt Kitab Sərgisi çərçivəsində, milli stenddə “Azərbaycanda multikultural dəyərlər” adlı tədbir keçirilib. Nazirlikdən AZƏRTAC-a bildirilib ki, Azərbaycanın Almaniyadakı səfiri Ramin Həsənov tədbirdə ölkəmizdə multikulturalizm ənənələri və hazırda bu sahədə görülmüş işlər barədə geniş məlumat verib. Tədbirdə Avropa Azərbaycanlıları Konqresinin prezidenti Samirə Patzer–İsmayılova, Avropa Azərbaycanlıları Konqresinin fəxri prezidenti Başar Kömür, Almaniyanın Reynland Pfalts əyalətinin deputatı Rahim Şmitt və “Şprenflingen Gensingen” İcmalar Birliyinin rəhbəri Manfred Şerer çıxış edərək multikultural dəyərlərin Azərbaycandakı və dünyadakı hazırkı vəziyyəti barədə məlumat veriblər.xeber100.com

I Regional elmi-nəzəri konfransa dəvət…

Azərbaycan Dövlət Musiqili Teatrının direktoru  Əliqismət Lalayev İran İslam Respublikasında keçiriləcək Teatr sənəti üzrə I Regional Elmi-nəzəri Konfransa dəvət olunub. Musiqili Teatrın Mətbuat katibi S.Sədaqətoğlu bildirib ki, konfrans İran İslam Respublikasının “Dramatik İncəsənət Mərkəzi”nin təşkilatçılığı ilə 2016-cı il 30 oktyabr-1noyabr tarixlərində Tehran şəhərində baş tutacaq. Səhnə sənəti mövzusunda keçiriləcək I Regional Elmi-nəzəri Konfransda bir çox ölkələrin tanınmış incəsənət xadimləri, elm adamları, teatr sənətinin nüfuzlu nümayəndələri iştirak edəcək. Tədbirdə çağdaş dünya teatrlarının inkişaf prespektivləri, beynəlxalq əlaqələrin qurulması və inkişafı, teatr sənətinin bugünü, sabahı və s. məslələlər ətrafında müzakirələr aparılacaq. İyirmiyə yaxın ölkənin tanınmış səhnə xadimlərinin qatılacağı I Regional Elmi-nəzəri Konfransda Azərbaycanı Əliqismət Lalayev təmsil edəcək.xeber100.com

“Beynəlxalq keramika üzrə duet-simpozium” adlı layihənin açılışı olub

İçərişəhərdəki Keramika Mərkəzində “Arts Council Azerbaijan” təşkilatının və Keramika Mərkəzinin birgə layihəsi olan “Beynəlxalq keramika üzrə duet-simpozium” adlı layihənin açılışı olub. Azərtac xəbər verir ki, layihə Cənubi Qafqaz üzrə İsveçrə Əməkdaşlıq Təşkilatının maliyyə dəstəyi ilə “Culture and Management Lab” təşkilatı tərəfindən həyata keçirilən “Cənubi Qafqazda Regional İncəsənət və Mədəniyyət Layihəsi” çərçivəsində gerçəkləşib. Duet-simpoziumda tanınmış azərbaycanlı keramika ustası Mirteymur Məmmədov, Moldovadan Valentin Rusunun iştirakı ilə baş tutub. Layihənin məqsədi müxtəlif ölkələrdən olan keramika ustalarının işlərini öyrənmək və təcrübə mübadiləsi aparmaqdır. Noyabrın 2-dək davam edəcək simpoziuma MDB-dən və dünyanın müxtəlif ölkələrindən peşəkar rəssamlar - keramika ustaları dəvət olunacaq. Duet-simpoziumların işləri əsasında müxtəlif növ və janrlarda müasir incəsənət əsərlərindən ibarət kolleksiya yaradılacaq. Sonda seçilmiş əsərlərdən ibarət sərginin təşkil olunması da nəzərdə tutulub.xeber100.com

TÜRKSOY-un dəstəyi ilə sərgi açılıb

TÜRKSOY-un dəstəyi ilə Türkiyənin Malatya şəhərində təşkilata daxil olan ölkələri təmsil edən 22 rəssamın sənət əsərlərindən ibarət sərgi açılıb. Anadolu agentliyinin məlumatına görə, 19-cu dəfə gerçəkləşən, İnönü Universiteti və Türk Əməkdaşlıq və Koordinasiya Agentliyinin təşkilatçılığı ilə baş tutan sərgidə 100-dək sənət əsəri nümayiş olunur. Türk dünyasının qardaşlıq tablolarının da yer aldığı sərgidə müxtəlif mövzulu sənət əsərlərini görmək mümkündür. TÜRKSOY-un Baş katibinin müavini Fırat Purtaş sərginin əhəmiyyətindən söz açaraq deyib ki, bu il Azərbaycan, Qazaxıstan, Qırğızıstan, Özbəkistan və Türkmənistanın müstəqillik əldə etmələrindən 25 il ötür. Sərgi də məhz, bu münasibətlə təşkil olunub.xeber100.com