Yaponiya parlamentinin aşağı palatasının buraxıldığı rəsmi şəkildə elan edilib

Sentyabrın 28-də Yaponiya parlamentinin aşağı palatasının buraxıldığı rəsmi şəkildə elan edilib. Hökumətin yeni seçkiləri oktyabrın 22-nə təyin edəcəyi, oktyabrın 10-da isə seçkiöncəsi kampaniyanın başlayacağı gözlənilir.Baş nazir Şinzo Abe 2019-cu il üçün planlaşdırılan mənfəətin bölgüsünə yenidən baxılması və istehlak vergisinin 8 faizdən 10 faizə qaldırılması ilə seçicilərin dəstəyini qazanmaq niyyətindədir.Bununla yanaşı, əsas rəqib olan Demokratik Partiyanın lideri Seyzi Maehara partiyasının üzvlərini namizədliklərini Tokionun qubernatoru Yuriko Koikenin yeni yaratdığı “Ümid” partiyası adından irəli sürməyə çağırıb.Bu barədə qərar faktiki olaraq Demokratik Partiyanın “Ümid” partiyası ilə birləşməsi və seçkiöncəsi siyasi landşaftın ciddi şəkildə dəyişməsi deməkdir. Lakin S.Maehara bu məsələdə partiyası daxilində rəqabətlə qarşılaşıb.Yaponiyanın müharibədən sonrakı tarixində aşağı palata dördüncü dəfədir ki, parlamentin çağırıldığı gün buraxılır. Parlamentin aşağı palatasının son tərkibi təqribən üç il bundan əvvəl seçilmişdi.Seçkiöncəsi kampaniyanın əsas mövzularının istehlak vergisinin artırılması, Konstitusiyada Ş.Abe tərəfindən təklif edilən dəyişikliklər, eyni zamanda, parlamentin aşağı palatasının bu barədə heç bir müzakirə aparılmadan buraxılması məsələsi olacağı gözlənilir.xeber100.com

6 bal gücündə zəlzələ olub

Yaponiyada 6 bal gücündə zəlzələ olub.Yaponiya Meteorologiya Agentliyi xəbər verir ki, zəlzələ İvata və Aomoro şəhərlərində baş verib. Zəlzələnin episentri 30 kilometr dərinlikdə olub.İlkin məlumatlara görə, dağıntı və tələfat yoxdur.xeber100.com

Ukrayna Daxili İşlər Nazirliyinin məlumatına görə…

Ukraynanın Vinnitsa vilayəti yaxınlığında yerləşən hərbi sursat anbarında partlayış baş verib.RİA informasiya agentliyi xəbər verir ki, Ukrayna Daxili İşlər Nazirliyi bu barədə məlumat verib. Qeyd edilib ki, Kalinovka şəhərinin və ətraf kəndlərin sakinləri evakuasiya edilib. Həmçinin hadisənin baş verdiyi ərazinin üzərində hava məkanı 50 kilometr radiusunda tam bağlanıb."112.Украина" agentliyinin məlumatına əsasən, bu hərbi sursat anbarında “Smerç”, “Uraqan” və “Qrad” tipli raketlər saxlanılır.xeber100.com

“Aurora-2017” hərbi təlimlərində

İsveçin paytaxtı Stokholmun cənubunda içində dörd nəfərin olduğu zirehli transportyor qatar ilə toqquşub.Azərtac xəbər verir ki, "Aurora-2017" hərbi təlimlərində iştirak edən İsveç Silahlı Qüvvələrinə məxsus zirehli transportyorda olan üç hərbçi və qatarda olan bir nəfər yüngül xəsarətlər alıblar.xeber100.com

Pakistan mətbuatı yazır…

Pakistanin sabiq baş naziri Nəvaz Şərif ona qarşı irəli sürülən korrupsiya ittihamı ilə əlaqədar məhkəmə prosesində iştirak etmək üçün Londondan İslamabada qayıdıb.Pakistan mətbuatı xəbər verir ki, N.Şərif İslamabadda öz partiyasının – Pakistan Müsəlman Liqasının liderləri ilə görüşüb, son hadisələri müzakirə edib. Bildirilir ki, sentyabrın 27-də keçiriləcək məhkəmə prosesində ölkənin sabiq maliyyə naziri, son vaxtlar Londonda yaşayan İsxak Dar da iştirak edəcək.Xatırladırıq ki, Pakistan Ali Məhkəməsi cari il iyulun 28-də korrupsiya qalmaqalı ilə bağlı Nəvaz Şərifi baş nazir vəzifəsindən kənarlaşdırıb.xeber100.com

6,4 bal gücündə zəlzələ baş verib

Sakit okeanda Fici adaları yaxınlığında 6,4 bal gücündə zəlzələ olub. Bu barədə ABŞ Geoloji Xidməti məlumat yayıb.RİA Novosti Agentliyi xəbər verir ki, zəlzələnin ocağı 98,1 kilometr dərinlikdə yerləşib. ABŞ Geoloji Xidməti zəlzələnin fəsadları təhlükəsinin yaşıl səviyyəsini qeyd edib ki, bu da ölüm və iqtisadi zərər ehtimalının az olduğunu göstərir.xeber100.com

TASS informasiya agentliyinin məlumatı

İordan çayının qərb sahillərində Qüds şəhəri yaxınlığında Xar-Adar yaşayış yerində odlu silahla silahlanmış fələstinli İsrailin təhlükəsizlik xidmətinin əməkdaşlarına hücum edib.TASS informasiya agentliyi xəbər verir ki, insident nəticəsində 3 polis işçisi həlak olub. İsrail polisinin mətbuat xidməti hücum edən şəxsin də öldürüldüyünü bildirib.Qeyd edək ki, Fələstin-İsrail qarşıdurmasında hazırkı zorakılıq dalğası 2015-ci ilin sentyabrında başlayıb. Həmin vaxtdan etibarən soyuq və odlu silah, partlayıcı, həmçinin taran qismində istifadə olunan avtomobillər vasitəsilə törədilən yüzlərlə hücum nəticəsində 50 nəfərdən çox yəhudi və bir neçə xarici ölkə vətəndaşı öldürülüb, 500-dən artıq insan isə yaralanıb. Fələstin KİV-lərinin verdiyi məlumata görə isə hücum və terror aktları nəticəsində, həmçinin azı 300 fələstinli həyatını itirib.xeber100.com

Referendum keçirilməsi ilə bağlı müzakirə

Rusiya Prezidenti Vladimir Putin Türkiyə Prezidenti Rəcəb Tayyib Ərdoğan və İran Prezidenti Həsən Ruhani ilə telefon danışıqlarında İraq Kürdüstanında referendum ilə bağlı məsələləri müzakirə edib.Azərtac xəbər verir ki, bu barədə Kremlin mətbuat katibi Dmitri Peskov jurnalistlərə açıqlamasında deyib. O bildirib ki, Rusiyanın bu məsələ ilə bağlı mövqeyi dəyişməyib. Onun ölkəsi həmişə olduğu kimi, dövlətlərin ərazi bütövlüyünün qorunub saxlanmasına tərəfdardır. D.Peskovun fikrincə, bu, Yaxın Şərqdə sabitliyin və təhlükəsizliyin dəstəklənməsi üçün vacib şərtdir.xeber100.com

Yonhap agentliyinin məlumatına əsasən…

Beynəlxalq sanksiyaların sərtləşdirilməsi nəticəsində KXDR-də ilin əvvəlindən bəri benzinin qiyməti üç dəfə bahalaşıb.Azərtac xəbər verir ki, Cənubi Koreyanın Yonhap agentliyinin yaydığı məlumata əsasən, hazırda Şimali Koreyada yanacağın bir litrinin qiyməti 5,1 dollardır.Xatırladaq ki, Şimali Koreyanın altıncı nüvə sınağını keçirməsinə cavab olaraq, sentyabrın 12-də BMT Təhlükəsizlik Şurası bu ölkəyə qarşı sanksiyaların sərtləşdirilməsi barədə qətnamə qəbul edib. Şimali Koreyaya silah embarqosu, ölkəyə aviasiya yanacağının çatdırılmasına və KXDR-dən kömür, dəmir filizi, polad, dəniz məhsulları və digər malların alınmasına qadağa da daxil olmaqla, ən ağır sanksiya rejimi tətbiq olunub.xeber100.com

“Gazprom” şirkəti “Botaş” ilə birgə müəssisə yaradacaq

Rusiyanın enerji nəhəngi “Gazprom” şirkəti Türkiyənin “Botaş” şirkəti ilə birgə müəssisə yaradacaq.Azərtac “Gazprom”a istinadla xəbər verir ki, şirkət “Botaş”ın birgə müəssisənin yaradılması təklifinə razılıq verib.Rusiya təbii qazının Türkiyə və Avropaya nəqlini nəzərdə tutan “Türk axını” qaz boru kəmərinin (Turkish Stream) quru hissəsinin tikintisi üçün “Botaş” ilə birgə müəssisənin yaradılması şirkətin idarə heyəti tərəfindən təsdiqlənib. Həmçinin “Gazprom” idarə heyəti “TürkAkım Gaz Taşıma Anonim Şirketi”nə məxsus 50 səhmin hər birinin 1000 türk lirəsinə satın alınmasını təsdiqləyib.Qeyd edək ki, “Türk axını” layihəsi Qara dəniz üzərindən Türkiyənin Avropa hissəsinədək və daha sonra Yunanıstan sərhədinədək qaz boru kəmərinin tikintisini nəzərdə tutur. Kəmərin dəniz hissəsinin uzunluğu 910 kilometrə yaxın, quru hissəsi isə Türkiyə ərazisi üzrə 180 kilometrdir. Boru kəmərinin birinci xətti türk bazarı, ikincisi Cənubi və Cənub-Şərqi Avropa ölkələri üçün nəzərdə tutulur. Hər bir xəttin illik ötürücülük gücü 15,75 milyard kubmetrdir. Layihənin ümumi dəyəri 11,4 milyard avro həcmində qiymətləndirilir.xeber100.com