Rouminq tariflərinin ləğv edilməsini nəzərdə tutan qərar…

Avropa Parlamentinin təmsilçiləri, Avropa İttifaqının Şurası və Komissiyası cari il iyunun 15-dən rouminq tariflərinin ittifaq daxilində ləğv edilməsini nəzərdə tutan qərara gəliblər. Qərara əsasən, danışıqların tarifi 5 avro sentdən 3,2 avro sentə, SMS tarifləri 2 avro sentdən 1 avro sentə endirilir.Eyni zamanda, 5 il ərzində internet data xərcləri 1 qiqabayt data üçün 50 avrodan 7,7 avroya, 2022-ci ildə isə 2,5 avroya endirilir. Qərarın Avropa Parlamenti və Şurası tərəfindən rəsmi şəkildə təsdiqlənməsi gözlənilir.xeber100.com

İtaliya mətbuatının məlumatına görə…

Apennin yarımadasında seysmik aktivlik səngimir: ötən gecə İtaliya ərazisində 30-dan çox yeraltı təkan qeydə alınıb.İtaliya mətbuatı xəbər verir ki, Milli Geofizika və Vulkanologiya İnstitutunun məlumatına əsasən, ən güclü yeraltı təkan 4,2 bal gücündə olub. Marke regionunda Maçerata şəhəri yaxınlığında qeydə alınan zəlzələnin episentri yer səthindən 6 kilometr dərinlikdə yerləşib.Dağıntılar və xəsarət alanlar barədə hələlik heç bir məlumat verilmir.Xatırladaq ki, 2016-cı il avqustun 24-də indiki yeraltı təkanlardan təxminən 100 kilometr məsafədə baş verən dağıdıcı zəlzələ nəticəsində 300 nəfərədək insan həlak olmuşdu. Zəlzələ nəticəsində Amatriçe şəhəri demək olar ki, tamamilə dağılmışdı. Oktyabrda baş verən və 1980-ci ildən bəri Apennində qeydə alınan ən güclü zəlzələ isə 40 min nəfəri evsiz qoymuş, ölkənin mərkəzində yerləşən 100-ə yaxın yaşayış məntəqəsində ciddi dağıntılar törətmişdi.Bu il yanvar ayının ortalarında İtaliyanın mərkəzində 5 baldan yuxarı yeni yeraltı təkanlar seriyası baş verib. Abrusso regionunda yerləşən “Rigopiano” otelinin yer səthinin titrəməsi və güclü qarın səbəb olduğu uçqunun altında qalması nəticəsində 29 nəfər həyatını itirib.xeber100.com

ABŞ Senatı yeni dövlət katibinin namizədliyini təsdiqləyib

ABŞ Senatı Reks Tillersonun dövlət katibi postuna namizədliyini təsdiqləyib. Xarici KİV-lər xəbər verir ki, R.Tillerson ABŞ-ın sayca 69-cu dövlət katibi olub.Qeyd edək ki, bundan əvvəl R. Tillerson “ExxonMobil” şirkətinə rəhbərlik edib.xeber100.com

“Brexit” haqqında qanun layihəsinin birinci mərhələsi təsdiq edilib

“Brexit”ə son qoymaqla bağlı düzəlişi rədd edərək britaniyalı deputatlar fevralın 1-də hökumətə Avropa İttifaqından çıxma prosesini başlamağa icazə verən qanun layihəsinin nəzərdən keçirilməsinin davam etdirilməsini təsdiqləyiblər. “lemonde.fr” saytı xəbər verir ki, Şotlandiya Milli Partiyasının təklif etdiyi düzəlişin əleyhinə 498, lehinə 114 palata üzvü səs verib. Sözügedən düzəlişdə bildirilir ki, mühafizəkar hökumət Lissabon müqaviləsinin 50-ci maddəsini aktivləşdirməmişdən əvvəl regional parlamentlərlə məsləhətləşməyib. Buna görə də düzəlişdə qanun layihəsinə baxmamaq tələb olunurdu.Qanun layihəsi üzrə müzakirələr fevralın 6, 7 və 8-də davam etdiriləcək və sonda yekun səsvermə keçiriləcək.xeber100.com

“Ria Novosti” agentliyinin məlumatı

Çində yaşayış binasının çökməsi nəticəsində dağıntılar altında 6 nəfər qalıb. “Ria Novosti” agentliyi bildirir ki, bu barədə Çinin Sina portalı məlumat yayıb.Məlumatda qeyd olunur ki, yerli vaxtla səhər saat 08.05-də Çjetzyan əyalətinin Vençjou şəhərində baş verən hadisə zamanı beşmərtəbəli yaşayış binasının 3 seksiyası çöküb. Hadisə nəticəsində ümumilikdə 100-dən çox insana ziyan dəyib.Hadisə yerinə 8 xilasedici briqada cəlb olunub, axtarış və xilasetmə işləri aparılır. Ölən və yaralananların dəqiq sayı barədə məlumat verilmir.xeber100.com

Təhlükəsizlik məsələləri müzakirə olunacaq

Yaponiya və ABŞ nazirlər səviyyəsində görüşün yeni formatını hazırlayır. Həmin çərçivədə keçiriləcək görüşdə iki ölkə arasında iqtisadi və ticari siyasətlə yanaşı, təhlükəsizlik məsələləri də müzakirə olunacaq. Bu barədə fevralın 2-də Kyodo agentliyi məlumat yayıb.Məlumatda qeyd edilir ki, Yaponiya tərəfdən danışıqlarda iştirak edəcək nümayəndə heyətinə Baş nazirin müavini və maliyyə naziri Taro Aso rəhbərlik edəcək. Nümayəndə heyətinə xarici işlər naziri Fumio Kişida, müdafiə naziri Tomomi İnoda, iqtisadiyyat, ticarət və sənaye naziri Hiroşiqe Seko daxil olacaq. ABŞ tərəfini isə vitse-prezident Maykl Pens, dövlət katibi Reks Tillerson, müdafiə naziri Ceyms Mettis və ticarət naziri vəzifəsinə əsas namizəd Uilbor Ross təmsil edəcək. Nazirlərin belə geniş tərkibdə təmsil olunduğu bu format ilk dəfə tətbiq olunacaq.xeber100.com

“Brand Finance” konsaltinq şirkətinin hazırladığı hesabatda…

“Google” dünyanın ən bahalı brendi adını alıb. “vistanews.ru” saytının məlumatına görə, bu barədə “Brand Finance” konsaltinq şirkətinin hazırladığı hesabatda deyilir.İnternet korporasiya dünyanın ən bahalı brendlərinin reytinqində ilk yeri tutub. Şirkət “Apple” korporasiyasını da geridə qoyub.“Google” brendinin qiyməti 2016-cı ildə təxminən 25 faiz artıb və 109,47 milyard dollara çatıb. “Apple” brendi isə 27 faiz ucuzlaşaraq 107,141 milyard dollar olub.“Amazon.com” internet riteyli üçüncü yeri tutub - brendin qiyməti 53 faiz artaraq 106,396 milyard dollara qiymətləndirilir.“AT&T” telekommunikasiya şirkəti 45 faizdən çox bahalaşaraq 87,016 milyard dollar qiymətinə çatıb və bununla da dördüncü yeri tutub.“Microsoft” brendin qiyməti 13 faizdən çox bahalaşıb 76,265 milyard dollar olsa da, şirkət reytinqin beşinci cərgəsinə düşüb.Altıncı sırada ilk dəfə olaraq Amerika şirkəti deyil, Cənubi Koreya istehsalçısı “Samsung” şirkəti qərarlaşıb. Şirkətin dəyəri 13 faiz artaraq 66,219 milyard dollar təşkil edib.xeber100.com

“Flash Harris Interactive” tədqiqat kompaniyasının sorğusuna əsasən…

Fransızların əksəriyyəti həyat yoldaşının ətrafında yaranan qalmaqal səbəbindən sağ “Respublikaçılar” partiyasını təmsil edən Fransua Fiyonun prezident yarışından geri çəkilməsini istəyir. Interfax informasiya agentliyi xəbər verir ki, “Flash Harris Interactive” tədqiqat kompaniyasının sorğusuna əsasən, respondentlərin 69 faizi Fransa prezidenti postu uğrunda mübarizədə Fiyonu digər namizədin əvəz etməsinə tərəfdardır.Rəyi soruşulan fransızların 33 faizinin fikrincə, Fransanın keçmiş Baş naziri Alen Jüppenin Fiyonu əvəz edəcək ən yaxşı namizəd olduğunu bildirib. Daha 13 faiz vətəndaş isə ölkənin keçmiş başçısı Nikola Sarkozini namizəd görmək istəyir.Bundan başqa, respondentlərin cəmi 29 faizi prezident yarışında mübarizənin davam edəcəyi təqdirdə Fiyonun qalib gələcəyinə inanır. Eyni zamanda, rəyi soruşulan insanların yarıdan çoxu – 57 faizi Fransua Fiyonun digəri ilə əvəz olunacağı təqdirdə “Respublikaçılar” partiyasının namizədinin qalib gələcəyini proqnozlaşdırır.xeber100.com

Yaponiya mətbuatı yazır…

Hazırda təxminən 127 milyon nəfərin yaşadığı Yaponiyada əhalinin sayı 2053-cü ilə qədər 100 milyon nəfərədək azalacaq. Bunu ölkənin Səhiyyə Nazirliyinin nəzdində fəaliyyət göstərən Əhali və Sosial Sığorta Məsələləri üzrə Elmi-Tədqiqat İnstitutu bildirib. Yaponiya mətbuatı xəbər verir ki, institut bununla bağlı beş ildən bir tədqiqat aparır. Əvvəlki tədqiqatın nəticələri ilə müqayisədə əhalinin azalması prosesi müəyyən qədər zəifləyib. Əvvəllər 100 milyon nəfərdən aşağı göstəricinin 2048-ci ildə qeydə alınacağı deyilirdi. Azalma tempinin zəifləməsinə gənclər arasında nikaha və uşaqlara müsbət tendensiyanın artması səbəb olub.Eyni zamanda, bu proqnozları təsəlliverici saymaq tezdir: artıq 2065-ci ilədək Yaponiya əhalisinin sayının 88 milyon nəfərə enəcəyi gözlənilir.xeber100.com

“Türk axını” sazişi ratifikasiya edilib

Rusiya Federasiyası Federal Məclisinin Federasiya Şurası “Türk axını” sazişini ratifikasiya edib.Federasiya Şurasının mətbuat xidmətinin məlumatına görə, Şura sədrinin müavini İlyas Umaxanov sənədi təkcə iqtisadi və strateji baxımdan deyil, həm də Türkiyə ilə münasibətlərin tam formatda yaxşılaşdırılmasına doğru atılan siyasi cəhətdən mühüm addım kimi qiymətləndirib.Rusiya və Türkiyə “Türk axını” üzrə hökumətlərarası sazişi ötən il imzalayıb. Layihəyə əsasən, Qara dənizin dibi ilə salınacaq iki qaz kəmərinin hər biri vasitəsilə 15,75 milyard kubmetr qaz nəql olunacaq. Kəmərin bir qolu Rusiyadan Türkiyəyə, digər qolu isə Türkiyədən keçməklə Avropa ölkələrinə qaz nəqli üçün nəzərdə tutulub.xeber100.com