Çində qırmızı xəbərdarlıq elan olunub

Çinin şimal hissəsində havanın çirklənməsi ilə əlaqədar olaraq Pekin, qonşu Tiencin və digər 21 şəhərdə ən yuxarı səviyyədə olan qırmızı xəbərdarlıq elan edilib.Paytaxtda dekabrın 21-dək davam edəcək xəbərdarlıq ilə bağlı uşaq bağçaları və orta məktəblərin tətilə çıxması tövsiyə olunub. Bundan başqa, inşaat sahələrində və bəzi sənaye müəssisələrində iş dayandırılıb. Şəhərdə avtomobillərin hərəkətinə dövlət qeydiyyat nişanlarının son rəqəmlərinin tək və cüt olmasına əsaslanan məhdudiyyət qoyulub. Pekin hökuməti paytaxt sakinlərinə vacib olmadığı təqdirdə küçəyə çıxmamağı və otaqların pəncərələrini bağlı saxlamağı tövsiyə edib.xeber100.com

Birləşmiş Ştatların qanunlarına görə…

ABŞ İrana qarşı sanksiyalar haqqında qanunu daha 10 il uzadıb. Associated Press agentliyinin yaydığı məlumata görə, sənəd dekabrın 15-də gecəyarısı qüvvəyə minib.Birləşmiş Ştatların qanunlarına görə, bu müddətədək Prezident Barak Obama ABŞ Konqresinin İran əleyhinə sanksiyaların uzadılmasına dair qəbul etdiyi qanun layihəsini ya imzalamalı, ya da rədd etməli idi. Lakin Prezident bunların heç birini etməyib. Buna görə də sənəd avtomatik olaraq qanun qüvvəsinə minib.Xatırladaq ki, 2015-ci ilin iyulunda Vyanada İranın nüvə proqramı üzrə birgə fəaliyyət planı razılaşdırılmışdı. Bu il yanvarın 16-da BMT, ABŞ və Avropa İttifaqı İrana onun nüvə proqramı ilə bağlı tətbiq olunmuş iqtisadi və maliyyə sanksiyalarını ləğv etmişdilər. Bununla yanaşı, ABŞ prezidentinin İran İslam Respublikasına qarşı sanksiyalar haqqında fərmanları hələlik tam ləğv olunmayıb, yalnız dayandırılıb.xeber100.com

Suriya münaqişəsi Moskvada müzakirə ediləcək

Türkiyə, Rusiya və İran 5 ildən çoxdur davam edən Suriya münaqişəsinin həlli yollarını müzakirə etmək üçün dekabrın 27-də Moskvada bir araya gələcəklər.“lefigaro.fr” saytı xəbər verir ki, bu barədə Türkiyənin xarici işlər naziri Mövlud Çavuşoğlu “TGRT Haber” telekanalına müsahibəsində bildirib.“Bizim məqsədimiz bütün Suriya ərazisində atəşkəsə nail olmaq və münaqişənin siyasi yolla həlli üçün danışıqlara başlamaqdır”, - deyə o vurğulayıb.xeber100.com

Özbəkistan Konstitusiyasına görə…

Özbəkistan Liberal-Demokrat Partiyası Siyasi Şurasının dekabrın 12-də keçirilən iclasında Baş nazirin müavini Abdulla Aripovun Baş nazir postuna namizədliyi irəli sürülüb. A.Aripov hökumətdə gənclər siyasəti, mədəniyyət, informasiya sistemləri və telekommunikasiya məsələlərinə nəzarət edir.Özbəkistan Konstitusiyasına görə, ölkə parlamenti Ali Məclisində ən çox deputat yeri qazanan partiya Baş nazir postuna nümayəndəsinin namizədliyini irəli sürür.2014-cü ilin dekabrında Ali Məclisə keçirilən seçkilərdə hakim partiya 52 mandat qazanmışdı.Dekabrın 4-də Özbəkistanda keçirilən prezident seçkilərində bu partiyanın namizədi Şavkat Mirziyayev seçicilərin 88,61 faizinin səsini qazanaraq ölkə Prezidenti seçilib.xeber100.com

TASS informasiya agentliyinin məlumatına görə…

Fransada 70 kiloqram qızıl daşıyan inkassator avtomobili qarət olunub. Xəbər verilir ki, naməlum şəxslər qızıl külçələr daşıyan inkassator avtomobilini Lion şəhəri yaxınlığında qarət ediblər.TASS informasiya agentliyi xəbər verir ki, hüquq-mühafizə orqanlarının məlumatına görə, qarətçilər mövcud kotirovkalarla 2,5 milyon avro dəyərində olan 70 kiloqram qiymətli metalı oğurlayıblar. İnsident günün birinci yarısında Parisi Fransanın cənubu ilə birləşdirən A6 sürət magistralında baş verib.Qarətçilərin dörd nəfər olduqları bildirilir. Onlar inkassator maşınının yolunu kəsərək oradakı bütün qızılı götürüblər. Sonra içərisində yükü müşayiət edən iki inkassator olan avtomobilin qapılarını bağlayaraq maşına od vurub və qaçıblar.İnkassatorlar hadisə yerinə gələn jandarmlar tərəfindən xilas edilib. Polis qarətçiləri axtarır.xeber100.com

Əməkdaşlıq haqqında saziş imzalanacaq

Rusiyanın “VTB Bank”ı ilə Yaponiyanın üç ən iri banklarından biri olan “Sumitomo Mitsui” əməkdaşlıq haqqında saziş imzalamaq niyyətindədir. Bu barədə Yaponiyanın “Kyodo” agentliyi məlumat verir. “TASS” xəbər verir ki, müvafiq sənəd Rusiya Prezidenti Vladimir Putinin dekabrın 15-16-da Yaponiyaya səfəri çərçivəsində imzalana bilər. Saziş iki dövlət arasında biznes əlaqələrinin inkişafına kömək edəcək.Qeyd edək ki, Yaponiyanın “Mizuho” və “Sumitomo Mitsui” bankları Amerikanın “JP Morgan Chase Bank”ı ilə birlikdə “Qazprom” şirkətinə 800 milyon avro həcmində kreditin ayrılmasına dair saziş imzalayıb.xeber100.com

Əməkdaşlıq haqqında memorandum imzalanıb

Rusiya-İran Hökumətlərarası Komissiyasının Tehranda keçirilən iclasında İranın cənubunda istilik elektrik stansiyasının inşası və İran dəmir yolunun elektrikləşdirilməsi haqqında 2,5 milyard dollarlıq saziş imzalanıb. İstilik elektrik stansiyası Bəndər Abbas şəhərində tikiləcək. Həmçinin Qarmsar-İnçe-Barun dəmir yolu xəttinin elektrikləşdirilməsi nəzərdə tutulub.Tehran görüşü çərçivəsində İran və Rusiya neft və energetika sahəsində əməkdaşlıq haqqında memorandum da imzalayıblar. Energetika üzrə İran-Rusiya işçi qrupunun Tehranda keçirilən iclasında imzalanmış 23 bəndlik sənəddə neft yataqlarının kəşfiyyatı və neft hasilatı, neft hasilatı avadanlığının istehsalı sahələrində tərəfdaşlıq öz əksini tapıb.xeber100.com

Rumıniya parlamentinə keçirilən seçkilərdə…

Rumıniyanın “Avangarde” sosial araşdırma agentliyinin məlumatına əsasən, Rumıniyanın iki palatalı parlamentinə dekabrın 11-də keçirilən seçkilərdə Rumıniya Senatına Sosial-Demokrat (PSD) Partiyası 45,2 faiz, Milli Liberal Partiyası (PNL) 21,8 faiz, Rumıniyanı Qoru Birliyi (USR) 8,9 faiz, Liberal və Demokratların Alyansı (ALDE) Partiyası 6,5 faiz, Xalq Hərəkatı (PMP) Partiyası 6 faiz, Rumıniya Macarların Demokratik Birliyi (UDMR) Partiyası 6 faiz səs toplayıb.Deputatlar Palatasına isə Sosial-Demokrat (PSD) Partiyası 45,5 faiz, Milli Liberal Partiyası (PNL) 21,7 faiz, Rumıniyanı Qoru Birliyi (USR) isə 8,5 faiz, Liberal və Demokratların Alyansı (ALDE), Xalq Hərəkatı (PMP) və Rumıniya Macarların Demokratik Birliyi (UDMR) partiyaları hərəsi 6 faiz səs qazanıb.xeber100.com

Ümumxalq səsverməsi başa çatıb

Qırğızıstan Konstitusiyasına düzəlişlər edilməsi ilə bağlı ümumxalq səsverməsi (referendum) başa çatıb.Qırğızıstan Prezidenti Almazbek Atambayev Bişkekdəki 1209 nömrəli məntəqədə səs verib.Dövlət başçısı bildirib ki, Konstitusiyaya təklif edilən düzəlişlər ölkənin müstəqilliyini daha da möhkəmləndirəcək, demokratiya və xalqın hakimiyyətini gücləndirəcək.xeber100.com

Yeni Baş nazirin adı açıqlanıb

İtaliya Prezidenti Sergio Mattarella ölkənin yeni Baş nazirinin adını açıqlayıb. “lefigaro.fr” saytı xəbər verir ki, Prezident Mattarella sabiq xarici işlər naziri Paolo Centilonini ölkənin Baş naziri postuna təyin edib və ona yeni hökuməti formalaşdırmağı tapşırıb.xeber100.com