Beynəlxalq Miqrasiya Təşkilatının məlumatı…

2016-cı ilin ötən dövründə dəniz yolu ilə Avropaya keçməyə cəhd edən 4 min 621 mühacirin həyatını itirdiyi barədə məlumat verən Beynəlxalq Miqrasiya Təşkilatının sözçüsü Leonard Doyle bunu, əsil fəlakət adlandırıb. Anadolu informasiya agentliyinə istinadla xəbər verir ki, Leonard Doyle son üç gündə Aralıq dənizində daha 364 mühacirin boğularaq öldüyünü bildirib. Onun sözlərinə görə, bu il əksəriyyəti Yunanıstan və İtaliya olmaqla, Avropaya 343 min 589 mühacir gəlib. İndiyədək Yunanıstana 170 min 679, İtaliyaya isə 167 min 276 qaçqın daxil olub.Beynəlxalq Miqrasiya Təşkilatının sözçüsü ötən ilin eyni dövründə Avropaya gedən mühacirlərin 729 min nəfərə yaxın olduğunu bildirərək, bu il artan ölüm hallarına diqqət çəkib.xeber100.com

ABŞ-da neft axtarışına qadağa…

Barak Obama ABŞ-ın enerji şirkətlərinin qütb bölgələrində neft axtarışı fəaliyyətini əngəlləyib.Azərtac xəbər verir ki, ABŞ Prezidenti Barak Obama vəzifə müddətinin bitməsinə iki ay qalmış ABŞ-ın Alyaska ştatı sahillərində neft-qaz axtarışı və hasilatı fəaliyyətinə mane olub.Belə ki, Obama hökuməti neft-qaz axtarışı və hasilatı fəaliyyətləri üçün enerji şirkətlərinə verilən icarə haqlarını ləğv edib. Sözügedən qanun 2017-ci il iyulun 1-dən qüvvəyə minəcək, Alyaska ştatının şimalındakı Bofort və Çukot dənizlərində işləyən şirkətləri əhatə edəcək.xeber100.com

5,4 bal gücündə zəlzələ baş verib

Noyabrın 19-da günorta saatlarında Yaponiyanın Mərkəzi hissəsində 5,4 bal gücündə zəlzələ baş verib. Sunami təhlükəsi elan olunmayıb.Milli Meteorologiya Agentliyinin məlumatına görə, yeraltı təkanlar yerli vaxtla saat 11:48-də Vakayama prefekturasında qeydə alınıb. Zəlzələnin ocağı 60 kilometr dərinlikdə yerləşib.Yeraltı təkanlar 23 prefekturada hiss olunub. Daha güclü təkanlar Osaka, Vakayama, Mie, Kioto, Nara və Siqa prefekturalarında qeydə alınıb.xeber100.com

Fox13 telekanalının məlumatına görə…

ABŞ-ın Nevada ştatında sanitar-nəqliyyat təyyarəsinin qəzaya uğraması nəticəsində bir neçə nəfər həlak olub.Azərtac xəbər verir ki, Fox13 telekanalının məlumatına görə, insident noyabrın 18-də yerli vaxtla saat 20:30-da baş verib. Ürək xəstəliyindən əziyyət çəkən pasiyenti qonşu Yuta ştatına aparmalı olan “Piper PA 31” təyyarəsi havaya qalxdıqdan az sonra yerli aeroportun yaxınlığında avtomobil dayanacağına düşüb.Yerli hökumətin məlumatına əsasən, təyyarənin göyərtəsindəki 4 nəfər, o cümlədən iki ekipaj üzvü, tibb bacısı və pasiyent həlak olub. Hadisə nəticəsində dayanacaqdakı bir neçə avtomobil yararsız hala düşsə də, yerdə heç kimin xəsarət almadığı bildirilir.xeber100.com

Rusiyanın neft hasilatı 30 faiz azalacaq

2040-cı ilə qədər Rusiyanın neft hasilatı 30 faiz azalaraq gündəlik 8,5 milyon barrelə düşəcək.Azərtac xəbər verir ki, bu barədə Beynəlxalq Enerji Agentliyinin (IEA) hesabatında deyilir. Bildirilir ki, Qərbi Sibir və Volqa-Ural bölgəsindəki yeni neft yataqlarına, eləcə də şist nefti və Şimal Qütbündə neft axtarışı işləri kimi yeni layihələrin inkişaf etdirilməsinə baxmayaraq bu, uzun müddətdə Rusiyanın neft yataqlarındakı azalmanı kompensasiya etməyə yetməyəcək. Ölkənin neft hasilatı 2040-ci ilədək gündəlik 8,5 barrelə qədər geriləyəcək.Beynəlxalq Enerji Agentliyi 2020-ci ildə Rusiyanın gündəlik neft hasilatının 10,9 milyon barrel səviyyəsində olacağını, bu rəqəmin 2025-ci ildə 10,5 milyon barrelə, 2030–cu ildə 9,8 milyon barrelə, 2035-ci ildə isə 9,3 milyon barrelə düşəcəyini proqnozlaşdırır.xeber100.com

Niderland xüsusi xidmət orqanlarının məlumatı…

Niderlandın xüsusi xidmət orqanları İŞİD qruplaşmasının Avropada terror hücumları hazırladığı barədə məlumat yayıb. Məlumatda Avropa ölkələrində qruplaşmanın 60-80 yaraqlısının olduğu bildirilir.Xarici KİV-lər xəbər verir ki, terrorla mübarizə üzrə koordinator Dik Shoof İŞİD-in potensial tərəfdarlarının Suriya və İraqa getməyərək, Avropada hücum planları hazırladıqlarını deyib. Onun sözlərinə görə, bu səbəbdən son altı ay ərzində hər iki ölkədə döyüşən yaraqlıların sayında artım müşahidə olunmur. Lakin bu, potensial terror təhlükəsinin azalması demək deyil.Məlumatda, həmçinin qeyd olunur ki, Avropadan İraq və Suriyada döyüşən “xarici yaraqlıların” sayı təxminən 4-5 min nəfərdir.xeber100.com

Regional və beynəlxalq məsələlər müzakirə edilib

Türkiyə Prezidenti Rəcəb Tayyib Ərdoğan Özbəkistanda səfərdədir.Səfər çərçivəsində R.T.Ərdoğan Özbəkistan Prezidentinin səlahiyyətlərini icra edən Baş nazir Şavkat Mirziyayevlə görüşüb.Görüşdə Özbəkistan ilə Türkiyə arasında ikitərəfli münasibətlərin indiki vəziyyəti və perspektivləri ətrafında fikir mübadiləsi aparılıb, tərəfləri maraqlandıran regional və beynəlxalq məsələlər müzakirə edilib.Türkiyə Prezidenti dekabrın 4-də Özbəkistanda keçiriləcək prezident seçkilərində Şavkat Mirziyayevə uğurlar arzulayıb, iki ölkə arasında əlaqələrin daha da inkişaf edəcəyinə əminliyini bildirib.R.T.Ərdoğan prezident seçiləcəyi təqdirdə Ş.Mirziyayevi Türkiyəyə səfərə dəvət edib.Səfər çərçivəsində Türkiyə dövlətinin başçısı Özbəkistanın birinci Prezidenti İslam Kərimovun məzarını ziyarət edib, onun xatirəsinə ehtiramını bildirib.xeber100.com

Rusiya hökuməti icazə kvotası müəyyən edib

Rusiya hökuməti 2017-ci il üçün əcnəbilərin ölkədə müvəqqəti yaşamasına icazə kvotasını müəyyən edib. Bu il kvotanın sayı ötən illə müqayisədə 11,9 faiz azalıb.Müvafiq sərəncama əsasən, gələn il əcnəbi vətəndaşların və vətəndaşlığı olmayan şəxslərin Rusiyada müvəqqəti yaşaması üçün 110 min 880 icazə sənədi verilə bilər. Bu say ölkənin bütün subyektləri arasında bölünəcək.xeber100.com

Sloveniya parlamentinin qərarına əsasən…

Sloveniya Avropa İttifaqında ilk dövlət olaraq içməli sudan istifadə hüququnu konstitusiya ranqına qaldıraraq təməl hüquqlar sırasına daxil edib. Ölkə parlamentinin deputatları konstitusiyaya əlavə fəslin daxil edilməsinə dair qərarı yekdilliklə dəstəkləyiblər. Həmin fəsildə “hər bir şəxsin içməli sudan istifadə hüququ” olduğu göstərilib və içməli suyun “əmtəə olmadığı” qeyd edilib. Əhalinin içməli su ilə təchizatı dövlət tərəfindən bələdiyyələr vasitəsilə həyata keçirilməli və bu, “birbaşa və qeyri-kommersiya” formasında olmalıdır.Bununla da içməli su mənbələri və içməli su ilə təchizatın özəlləşdirilməsinə dair ölkədə uzun müddətdən bəri aparılan müzakirələrə son qoyulub. Müxtəlif cəmiyyətlər tərəfindən özəlləşdirməyə qarşı qaldırılan təşəbbüsə Baş nazir Miro Tserarın rəhbərlik etdiyi mərkəz-solçu hökumət də qoşulub.xeber100.com

22 milyon dollar kompensasiya ödəniləcək

Noyabrın 17-də Okinava dairə məhkəməsinin Naha bölməsi bu ərazidə yerləşən ABŞ hərbi bazasına məxsus aviasiyanın yaratdığı səs-küy nəticəsində dəyən zərərə görə mərkəzi hökumət orqanlarının yerli əhaliyə 22 milyon dollar kompensasiya ödəməsi barədə qərar qəbul edib.Bununla yanaşı, məhkəmə sakinlərin müəyyən edilmiş standartları aşan səs-küyün qarşısının alınması barədə tələbini rədd edib.ABŞ-ın Futemmada yerləşən dəniz piyadaları korpusunun aviapostu ətrafında yaşayan təqribən 3400 sakin 2012-ci ildə mərkəzi hökumətə qarşı iddia qaldırıb. Onlar hökumətdən aviasiyanın yaratdığı səs-küyü mövcud standartlar səviyyəsinə qədər azaltmaq üçün tədbirlər görməyi və əhalinin sağlamlığına dəyən zərərə görə kompensasiya ödəməyi tələb edirdilər.xeber100.com