“Global Times” qəzetinin məlumatına əsasən…

Çində “Alibaba” elektron ticarət saytı dünyanın ən böyük alış-veriş günü kimi qəbul edilən noyabrın 11-də “subaylar günü”nün ilk 7 dəqiqəsində 10 milyard yuan (1,43 milyard dollar), ilk saatında isə 36,2 milyard yuan (təxminən 5 milyard dollar) məbləğində satışa nail olub. Anadolu informasiya agentliyi xəbər verir ki, Çin Kommunist Partiyasının rəsmi orqanı olan “Global Times” qəzetinin məlumatına əsasən, ölkənin internet ticarətinin nəhəngi ötən ilin eyni gününün ilk saatındakı 3,9 milyard dollarlıq rekordunu 25 faizlik artımla yeniləyib. Ticarətin böyük əksəriyyəti mobil cihazların satışı ilə bağlı olub. Qeyd edək ki, Çində internet vasitəsilə ticarətin 84 faizi “Alibaba” saytı üzərindən həyata keçirilir.

Parlament hökumətin strukturunu və proqramını təsdiq edib

Qırğızıstanın Baş nazirinin səlahiyyətlərini icra edən Sooronbay Jeenbekovun təqdimatına əsasən ölkə parlamenti-Joqorku Keneş noyabrın 9-da keçirilən plenar iclasında hökumətin strukturunu və proqramını təsdiq edib. Sooronbay Jeenbekov Qırğızıstanın Baş naziri, Muxammetkalıy Abulqaziev birinci müavin, Oleq Pankratov, Çolpon Sultanbekova və Jeniş Razakov Baş nazirin müavinləri, Akılbek Osmonaliev nazir ranqında Hökumət Aparatının rəhbəri vəzifələrinə təsdiq ediliblər. Parlamentin iclasında Arzıbek Kojoşevi iqtisadiyyat, Adılbek Kasımaliev maliyyə, Nurbek Muraşev kənd təsərrüfatı, yeyinti sənayesi və meliorasiya, Jamşitbek Kapilov nəqliyyat və yollar, Uran Axmetov ədliyyə, Erlan Abdıldaev xarici işlər, Ulan İsrailov daxili işlər, Kubatbek Boronov fövqəladə hallar, Talantbek Batıraliev səhiyyə, Tuqelbay Kazakov mədəniyyət, informasiya və turizm, Qulmira Kudayberdieva təhsil və elm, Talaykul İsankulov əmək və sosial inkişaf nazirləri vəzifələrinə təyin ediliblər.xeber100.com

ABŞ-da hakimiyyətin təhvil verilməsi prosesi 73 gün davam edir

Barak Obama bu gün Ağ evdə Birləşmiş Ştatların yeni seçilmiş prezidenti Donald Trampı qəbul edəcək. Amerika administrasiyasının hazırkı başçısı seçki kampaniyasının gedişində dəstəklədiyi Hillari Klintonun lazımi miqdarda səs toplaya bilməyəcəyi bəlli olduqdan sonra milyarderi qələbə qazanması münasibətilə təbrik edib.  Euronews telekanalı xəbər verir ki, Barak Obama hər bir seçkinin yekununda qalib və məğlub tərəflərin olduğunu xatırladıb. Həmçinin qeyd edib ki, namizədlərin hansı düşərgəyə məxsus olmasının əhəmiyyəti yoxdur və onların hər ikisi vətənpərvərdir. Donald Tramp da öz növbəsində qələbəsini elan etdikdən sonra fikir ayrılıqlarını unutmağa çağırıb. Qeyd edək ki, ABŞ-da hakimiyyətin təhvil verilməsi prosesi 73 gün davam edir. Donald Tramp prezident vəzifəsinin icrasına de-fakto 2017-ci il yanvarın 20-dən etibarən başlayacaq.xeber100.com

TASS informasiya agentliyinin məlumatına görə…

Mixail Saakaşvili müxalifətin xeyrinə siyasi seçim edib. TASS informasiya agentliyi xəbər verir ki, bu fikri Soveniyada səfərdə olan Ukrayna Prezidenti Pyotr Poroşenko Odessa vilayətinin qubernatoru Mixail Saakaşvilinin istefasını şərh edərkən bildirib. Ukrayna Prezidenti Lyublyanada mətbuat konfransında bu barədə danışarkən deyib: “Mənim fikrimcə, cənab Saakaşvilinin bəyanatı onun Ukrayna müxalifətinin xeyrinə siyasi seçim etdiyini göstərir. Bu, onun hüququdur. Ümidvaram ki, Ukrayna hökuməti qubernatorun istefasını qəbul edəcək və onun bizim ölkəmizdə siyasi fəaliyyətini davam etdirməsinə icazə verəcək”.Pyotr Poroşenkonun sözlərinə görə, Saakaşvilinin istefası ilə bağlı səsvermə noyabrın 9-da keçiriləcək.xeber100.com

ABŞ-ın 45-ci prezidenti seçilib

ABŞ-da keçirilən Prezident seçkiləri Respublikaçılar partiyasının namizədi Donald Trampın qələbəsi ilə başa çatıb. Azərtac xəbər verir ki, Donald Tramp son olaraq Viskonsin ştatında da qalib gələrək seçənlər kollegiyasının bu ştat üzrə 10 səsini alıb. Bununla da Donald Tramp ABŞ-ın 45-ci prezidenti seçilib. Yeni Prezident qələbədən sonra Nyu-Yorkda tərəfdarları ilə görüşdə çıxış edərkən bildirib: “Dünyanın ən güclü iqtisadiyyatına sahib olacağıq. Eyni zamanda, bütün xalqlarla mehriban münasibətləri davam etdirəcəyik”.1946-cı ildə Nyu-Yorkda anadan olan Donald Tramp ABŞ tarixində ən yaşlı prezident olacaq. “Forbes” jurnalının 2016-cı ildə “Dünyanın ən zəngin 400 insanı” siyahısında yer alan Donald Trampın sərvətinin 3,6 milyard dollar dəyərində olduğu təxmin edilir.xeber100.com

NHK TV-nin məlumatına görə…

Yaponiya və Qazaxıstan liderləri nüvə tərksilahı və nüvə silahının yayılmaması sahəsində əməkdaşlıq barədə razılığa gəliblər. NHK televiziya kanalının yaydığı məlumata görə, bu barədə razılaşma Yaponiyanın Baş naziri Şinzo Abe ilə Qazaxıstan Prezidenti Nursultan Nazarbayevin noyabrın 7-də Tokioda keçirilən görüşü zamanı əldə edilib. Görüşdə Ş.Abe BMT səviyyəsində ikitərəfli əməkdaşlığın vacibliyini vurğulayıb, nüvə tərksilahı və bu silahın yayılmaması sahəsində birgə fəaliyyəti yüksək qiymətləndirib. Liderlərin birgə bəyanatında qeyd edilib ki, Yaponiya və Qazaxıstan digər dövlətləri Nüvə Sınaqlarının Hərtərəfli Qadağan Olunması üzrə Müqaviləyə qoşulmağa çağırır.xeber100.com

5,9 bal gücündə zəlzələ baş verib

Avropa Aralıq dənizi seysmologiya mərkəzinin məlumatına əsasən, Çili sahillərində 5,9 bal gücündə zəlzələ baş verib. Azərtac xarici KİV-lərə istinadla xəbər verir ki, yeraltı təkanlar noyabrın 8-də yerli vaxtla saat 04:55-də qeydə alınıb. Zəlzələnin episentri Talkayano şəhərindən 42 kilometr şimal-qərbdə yer səthindən 2 kilometr dərinlikdə yerləşib. Təbii fəlakət nəticəsində dağıntılar və zərər çəkənlər barədə hələ ki, heç bir məlumat verilmir.xeber100.com

1941-ci il paradının 75-ci ildönümünə həsr olunmuş təntənəli marş keçirilib

Moskvada, Qırmızı meydanda əfsanəvi 1941-ci il paradının 75-ci ildönümünə həsr olunmuş təntənəli marş keçirilib. Azərtac Rusiyanın NTV telekanalına istinadla xəbər verir ki, Moskvanın baş meydanında keçirilən yürüşdə 5 mindən çox insan – paytaxt qarnizonunun hərbi qulluqçuları, Prezident polkunun kavaler qrupu, Preobrajensk əlahiddə komendant polkunun fəxri qarovul rotası, Moskva Suvorov məktəbinin yetirmələri və kadet məktəblərinin şagirdləri iştirak edib. Marş tarixi və müasir hissələrdən ibarət olub. Meydandan əfsanəvi parad iştirakçılarının nəvə və nəticələri də keçiblər. Yetmiş beş il əvvəl mühasirəyə alınmış Moskvada 28 mindən çox insanın iştirakı ilə keçirilmiş parad Böyük Vətən müharibəsinin sonrakı gedişinə böyük təsir göstərmiş, ordunun və bütün ölkənin əhvali-ruhiyyəsini yüksəltmişdi.xeber100.com

Kosmosa kommersiya səfərlərinin təşkili planlaşdırılır

Çin 2020-ci ildən kosmosa kommersiya səfərlərinin təşkilini planlaşdırır. Bu barədə “ChinaRocket” şirkətinin prezidenti Xan Çinpin Cuxay şəhərində keçirilmiş 11-ci Çin beynəlxalq aviasiya və kosmonavtika sərgisində məlumat verib. Xan Çinpin bildirib ki, kosmosa turizm səfərlərinin təşkili ilə bağlı üçmərhələli proqram hazırlanıb. 2020-2024-cü illəri əhatə edən ilkin mərhələdə 3-5 nəfərlik turist qrupları 10 tonluq kosmik təyyarələrdə Yer kürəsindən 60-80 kilometr yüksəkliyə uçmaq imkanı qazanacaq. Növbəti mərhələlərdə isə turistlər daha böyük təyyarələrlə bir qədər də yüksəkliyə (120-140 kilometr) uça biləcəklər.xeber100.com

Yaponiya Təftiş Şurasının məlumatı…

2016-cı ilin mart ayında başa çatmış maliyyə ilində Yaponiya hökumətinin səmərəsiz məsrəfləri 11 milyard dollardan çox olub. Bu barədə Yaponiya Təftiş Şurasının rəsmi nümayəndələri məlumat veriblər. Təftiş Şurasının rəhbəri bu barədə hesabatı Yaponiyanın Baş naziri Şinzo Abeyə təqdim edib. Müfəttişlər xərclərin düzgün nəzarət edilmədiyi 455 hal aşkar ediblər. Onların sözlərinə görə, həmin hallar nəticəsində, ümumilikdə, 11 milyard 700 milyon dollar səmərəsiz xərc qeydə alınıb. Bu, həmin rəqəmin hesablanmağa başladığı dövrdən indiyədək ikinci belə böyük göstəricidir.xeber100.com