İtaliya hökumətinin qərarı…

İtaliya hökuməti gənclərin mədəni fəaliyyətlərini təşviq etmək üçün 18 yaşı tamam olan hər bir vətəndaşa 500 avro verməklə bağlı qərar qəbul edib. “Telegraph” qəzeti xəbər verir ki, sentyabrın 15-dən etibarən tətbiq ediləcək bu yenilik gəncləri daha çox kitab oxumağa, muzeylərə, teatrlara baş çəkməyə həvəsləndirmək məqsədi daşıyır. İtaliyanın Baş naziri Matteo Renzinin elan etdiyi bu təşəbbüsün 575 min yeniyetməni əhatə edəcəyi gözlənilir. Cari il 18 yaşı tamam olan gənclər bu mükafatdan istifadə etmək üçün online şəkildə qeydiyyatdan keçməlidirlər. Onlar “18app.it” adlı xüsusi aplikasiyanı yükləməklə pulu gələn ilin sonunadək xərcləyə bilərlər.xeber100.com

“IRNA” agentliyinin yaydığı xəbərə görə…

İran ilə Koreya Respublikası avqustun 29-dan etibarən ticarət əməliyyatlarını avro ilə həyata keçirməyə başlayacaq. “IRNA” agentliyinin məlumatına görə, İranın Xarici İşlər Nazirliyi Beynəlxalq Təhlükəsizlik və Siyasi İşlər üzrə baş direktoru Həmid Baidinejad rəsmi Tehran və Seul arasındakı ticarət əməliyyatlarının dollar əvəzinə təkcə avro ilə reallaşdırılacağını deyib. O bildirib ki, bu qərar nüvə razılaşması çərçivəsində və ABŞ-ın razılığı əsasında qəbul edilib. Koreya Respublikasının iqtisadiyyat naziri də ölkəsinin İranla ticarət əməliyyatlarını avro ilə həyata keçirəcəyini açıqlayıb.xeber100.com

Yarım əsri ötən müharibəyə son qoyulub

Kolumbiya İnqilabçı Silahlı Qüvvələri (FARC) ilə hökumət arasında yarım əsri ötən müharibəyə son qoyulub. Azərtac xarici KİV-lərə istinadla xəbər verir ki, bununla bağlı 52 illik müharibəni sona çatdıran “tarixi” sülh müqaviləsi Kubada imzalanıb. Müzakirələr nəticəsində qəbul edilən anlaşma sənədini Kolumbiya nümayəndə heyəti adından Humberto de la Calle ilə FARC-ın nümayəndəsi İvan Marquez imzalayıblar. Tərəflər verdikləri birgə açıqlamada Kolumbiya hökuməti və FARC arasında yekun, tam və qəti bir razılaşmaya nail olunduğunu bildiriblər.xeber100.com

“The Wall Street Journal” yazır…

ABŞ-dan Çinə ilk dəfə mayeləşdirilmiş təbii qaz (liquefied natural gas-LNG) ixrac olunub. “The Wall Street Journal”ın məlumatına görə, Panama kanalının yenidən qurulmasından sonra ABŞ yanacağının Asiyaya ixracı asanlaşıb. Maye qaz “Royal Dutch Shell” şirkəti tərəfindən Meksika körfəzinin “Sabine Pass” ixrac terminalından Çinin Yantyan limanına çatdırılıb. LNG-ni burada uzunmüddətli müqavilə çərçivəsində “China National Offshore Oil Corp.” şirkəti qəbul edib.xeber100.com

Euronews telekanalının məlumatına görə…

Braziliya senatı bu gün ölkə prezidenti Dilma Russeffin maliyyə pozuntuları ilə əlaqədar impiçmenti məsələsinin müzakirəsinə başlayacaq. Euronews telekanalının məlumatına görə, senatın iclası məhkəmə dinləmələri şəklində keçiriləcək. Tərəflərin vəkilləri və şahidləri, həmçinin Dilma Russeff senatorlar qarşısında çıxış edəcəklər. Bu ərəfədə tərəfdarları qarşısında çıxış edən Russeff yenidən bütün ittihamları rədd edərək günahsız olduğunu bildirib: “Mən heç vaxt korrupsiya yolu ilə pul qazanmamışam. Mənim başıma gələnlər Braziliyada demokratiyanın sarsılmasına açıq işarədir. Biz belə halların təkrarlanmaması üçün əlimizdən gələni etməliyik”. Avqustun 29-da Dilma Russeffin senatda son söz ilə çıxış edəcəyi, avqustun 31-də isə senatorların yekun səsverməsinin keçiriləcəyi gözlənilir. İmpiçmentin qəbul ediləcəyi təqdirdə dövlət başçısı postunu vitse-prezident və hazırda prezidentin səlahiyyətlərini icra edən Mişel Temer tutacaq.xeber100.com

Belarus Milli Məclisinin Respublika Şurası üzvlərinin seçkiləri başlanıb

Bu gün, avqustun 25-də altıncı çağırış Belarus Milli Məclisinin Respublika Şurası üzvlərinin seçkiləri başlanıb. BELTA agentliyinin məlumatına görə, Belarus parlamentinin yuxarı palatasına seçki kampaniyasının hazırlanması və keçirilməsi ilə bağlı təşkilati tədbirlərin təqvim planına uyğun olaraq seçkilər avqustun 25-dən sentyabrın 13-dək, yəni cari çağırış Respublika Şurasının səlahiyyət dövrünün başa çatmasına 35 gün qalana qədər keçiriləcək. Senator seçkiləri hər bir vilayətdə baza səviyyəli yerli deputatlar sovetlərinin və Minsk şəhər sovetinin iclaslarında gizli səsvermə yolu ilə bərabər və dolayı seçki hüququ əsasında keçirilir. Mərkəzi seçki komissiyası Respublika Şurası üzvlərinin seçkilərini sentyabrın 30-dan gec olmayaraq yekunlaşdıracaq və seçilmiş senatorları qeydiyyata alacaqdır.xeber100.com

Danimarka hökumətinin planına əsasən…

Danimarka hökuməti “xərçəng xəstəliyinə qarşı mübarizədə tarixi plan” adlandırdığı layihənin təfərrüatlarını dərc etdirib. IV “Xərçəngə qarşı mübarizə paketi”ndə bir çox müddəalarla yanaşı, gənclər arasında siqaretin qadağan olunmasına dair yeni maddə də yer alıb. Hökumətin planına əsasən təhsil müəssisələrində siqaret çəkmək əleyhinə yeni məhdudiyyətlər qoyulmalı, habelə həddi-büluğa çatmayanlara tütün məmulatlarının satışı qadağan edilməlidir. Sonuncu maddənin həyata keçirilməsinə nail olmaq üçün ölkənin iş adamları ilə iş aparılması planlaşdırılır.xeber100.com

Britaniyada miqrasiya probleminin həlli…

"“Brexit” Britaniyanın miqrasiya sistemindəki problemlərin aradan qaldırılması və ictimai etibarın yenidən qazanılması üçün böyük fürsətdir" Bu fikirlər Britaniyadakı beyin mərkəzlərindən birinin açıqlamasında qeyd edilib. O da qeyd olunur ki, britaniyalıların yarısı hökumətin miqrasiya problemini həll edəcəyinə və Britaniyada daimi yaşayacaq əcnəbilərin sayının dəqiqləşdiriləcəyinə inanmır. Hökumət yaxın gələcəkdə Britaniyada miqrasiya probleminin həll ediləcəyini, miqrantların dəqiq sayının ictimaiyyətə açıqlanacağını qeyd edib.xeber100.com

Suriyanın ərazi bütövlüyü uğrunda mübarizə…

Türkiyə ordusu koalisiya təyyarələrinin dəstəyi ilə Suriyanın şimalındakı Cerablus şəhərini İŞİD terrorçularının azadetmə əməliyyatına başlayıb. Anadolu agentliyinin məlumatına görə Türkiyənin Hərbi-Hava Qüvvələrinə məxsus döyüş təyyarələri İŞİD terror qruplaşmasının Suriyanın şimalında yerləşən Cerablus şəhərindəki mövqelərinə zərbələr endirib. Cerablusdakı əməliyyat Türkiyə sərhədlərinin terrorçu qruplaşmalarından təmizlənməsinə və Suriyanın ərazi bütövlüyünün qorunmasına yönəlib. Hərbi əməliyyat, həmçinin yeni miqrasiya axınlarının qarşısının alınmasına və dinc əhaliyə humanitar yardımların çatdırılmasına yönəlib.xeber100.com

Regional məsələlər müzakirə edilib

Yaponiyanın, Çinin və Koreya Respublikasının xarici işlər nazirləri avqustun 24-də Tokioda aparılan danışıqlar zamanı regional məsələləri müzakirə ediblər. Yaponiyanın xarici işlər naziri Fumio Kişida Çin və Koreya Respublikasından olan həmkarları Van İ və Yun Byon Se ilə Koreya Xalq Demokratik Respublikasının nüvə və raketlərin sınaqları məsələsi, həmçinin üç ölkə arasında azad ticarət razılaşması barədə fikir mübadiləsi aparıblar. Nazirlərin sonradan təşkil olunacaq ikitərəfli görüşlərində qarşılıqlı maraq doğuran məsələlərin müzakirə olunacağı bildirilir. NHK televiziya kanalının yaydığı məlumata görə, F.Kişida çinli həmkarı Van İ ilə görüşündə Senkaku adaları rayonunda Çin gəmilərinin yapon ərazi sularına daxil olması ilə bağlı etirazını bildirəcək və bu ölkəni təmkin nümayiş etdirməyə çağıracaq.xeber100.com