Azərbaycan Taekvondo Federasiyası: Belçika çempionatı başa çatıb

Lommel şəhərində keçirilən taekvondo üzrə açıq Belçika çempionatı başa çatıb. Azərbaycan Taekvondo Federasiyası xəbər verir ki, G2 kateqoriyalı yarışı millimiz 1 gümüş və 2 bürünc medalla başa vurub. Yığmanın heyətində Səyyad Dadaşov (54 kq) fəxri kürsünün ikinci pilləsinə qalxıb. Digər taekvondoçularımızdan Qaşım Maqomedov (58 kq) və Patimat Abakarova (53 kq) isə bürünc medala sahib olublar.xeber100.com

Azərbaycan Premyer Liqasının XXVII turunda…

Azərbaycan Premyer Liqasının XXVII turunda “Sumqayıt”ın qonağı olan “Qarabağ” 6:0 hesabı ilə qalib gəlib. Nəticədə Qurban Qurbanovun yetirmələrinin səfərdəki məğlubiyyətsizlik seriyası 23-ə çatıb. Peşəkar Futbol Liqası xəbər verir ki, Ağdam klubu cari mövsüm rəqib meydanındakı 14 görüşdə uduzmayıb. Ötən mövsümün son 9 səfərində də xalsız qalmayan Q.Qurbanovun yetirmələri sonuncu dəfə 2021-ci il oktyabrın 25-də “Səbail”lə görüşdə məğlub olub – 1:3. Rəqib meydanında keçirilən son 23 qarşılaşmada 19 qələbəsi olan “Qarabağ” 4 dəfə heç-heçə edib. Bununla da Azərbaycan çempionatları tarixinin rekordu təkrarlanıb. 1999-2001-ci illərdə ardıcıl 23 səfər oyunundan məğlubiyyətsiz ayrılan “Şəmkir” mütləq rekordçu idi. “Qarabağ” bu göstəricini 22 ildən sonra təkrarlamağa nail olub. Ağdam təmsilçisi növbəti səfər qarşılaşmasında yeni rekord müəyyənləşdirə bilər.xeber100.com

Azərbaycan Gimnastika Federasiyasının təşkilatçılığı ilə beynəlxalq tədbir keçiriləcək

Bu il Azərbaycan Gimnastika Federasiyasının təşkilatçılığı ilə ölkəmizdə daha bir beynəlxalq tədbir keçiriləcək. Federasiya xəbər verir ki, iyunun 17-də Dənizkənarı Milli Parkda Ulu Öndər Heydər Əliyevin anadan olmasının 100-cü ildönümünə həsr olunmuş gimnastika hamı üçün növü üzrə birinci beynəlxalq “Challenge” turniri təşkil ediləcək.xeber100.com

Azərbaycan Güləş Federasiyası: Güləş üzrə U-23 Avropa çempionatı davam edir

Rumıniyanın paytaxtı Buxarestdə təşkil olunan güləş üzrə U-23 Avropa çempionatı davam edir. Azərbaycan Güləş Federasiyası xəbər verir ki, üç sərbəst güləşçimiz yarımfinala yüksəlib. Belə ki, yarımfinala Turan Bayramov (74 kq), Abdulcəlil Şabanov (92 kq) və Vaxit Qalayev (125 kq) irəliləyiblər. T.Bayramov finala gedən yolda Kristian Biron (Rumıniya), A.Şabanov Andro Margişvili (Gürcüstan), V.Qalayev isə Solomon Manaşvili (Gürcüstan) ilə üzləşəcək. Ayxan Abdullazadə (61 kq) və Fərid Cabbarov (86 kq) ilk görüşlərində məğlub olublar. Onlar rəqibləri finala çıxsa, sabah təsəlliverici görüşə qatılacaqlar. Bu gün, həmçinin Rəşid Babazadə (65 kq), Maqomed-Başir Xaniyev (70 kq) və İslam İlyasov (97 kq) qızıl medal uğrunda mübarizə aparacaq. Onlar finalda, müvafiq olaraq Xamzat Arsamerzoyev (Fransa), Hayk Papikyan (Ermənistan) və Oktay Çiftçi (Türkiyə) ilə güləşəcəklər. Nurəddin Novruzov (57 kq) və Səbuhi Əmiraslanov (79 kq) bürünc medal qarşılaşmalarına çıxacaqlar. Üçüncü yer uğrunda görüşdə Novruzov Rafal Şevç (Polşa)/Edik Harutyunyan (Ermənistan) cütünün qalibi, S.Əmiraslanov isə digər Ermənistan təmsilçisi Narek Qriqoryanla münasibətlərinə aydınlıq gətirəcək. Avropa çempionatı martın 19-da başa çatacaq.xeber100.com

AFFA-nın təşkilatçılığı ilə “Qızlar Futzal Kuboku” turniri keçirilib

AFFA-nın təşkilatçılığı ilə martın 17-də və 18-də İsmayıllı rayonunda 14 yaşadək məktəbli qızlar arasında “Qızlar Futzal Kuboku” turniri keçirilib. AFFA-nın rəsmi saytı xəbər verir ki, turnirin ilk günü 12 komanda arasında qrup mərhələsi üzrə 12 oyun keçirilib. Növbəti gün isə pley-off mərhələsinin oyunlarına yekun vurulub. İsmayıllı Olimpiya İdman Kompleksinin idman zalında təşkil edilən turnirdə 12 məktəb və 90 yeni qız futbolçu qeydiyyatdan keçib. İştirakçı komandalar AFFA və UEFA tərəfindən idman geyimi və ayaqqabıları ilə təmin olunub. Təzəkənd kənd tam orta məktəb turnirin qalibi, II və III yeri isə müvafiq olaraq 5 nömrəli tam orta məktəb və 6 saylı tam orta məktəb tutub. 5 qolla 6 nömrəli tam orta məktəbin şagirdi Fidan Fərəcova turnirin ən məhsuldar oyunçusu olub. 5 nömrəli tam orta məktəbin şagirdi Nərmin Məmmədli ən yaxşı oyunçu, Təzəkənd kənd tam orta məktəbin şagirdi Günay Seyidova isə turnirin ən yaxşı qapıçısı seçilib. İlk üç yeri tutan komandalar diplom və medallar, qalib komanda isə kubokla mükafatlandırılıb. Mükafatları AFFA-nın Qadın futbolu departamentinin rəisi Əminə Həsənova və 15 yaşadək qızlardan ibarət milli komandanın baş məşqçisi Xanlar Əliyev təqdim ediblər. Qeyd edək ki, layihənin əsas məqsədi həm gələcəkdə qızlar futzal liqasını, həm də qadınlardan ibarət futzal üzrə milli komandanın yaradılmasıdır. AFFA və UEFA-nın dəstəyi ilə keçirilən “Qızlar Futzal Kuboku” layihəsinin 5 müxtəlif regionda keçirilməsi planlaşdırılır.xeber100.com

Güləş üzrə U-23 Avropa çempionatı davam edir

Rumıniyanın Buxarest şəhərində güləş üzrə U-23 Avropa çempionatı davam edir. Mübarizəyə 1/4 finaldan qoşulan Gültəkin Şirinova (53 kq) italiyalı Mariya Feroneni “tuş”la yarışdan kənarlaşdırsa da, yarımfinalda türkiyəli Zeynep Yetgillə bacarmayıb - 0:5. G.Şirinova bürünc medal uğrunda güləşəcək. O, Mariana Draqutan (Moldova) - Çadia Ayaçi (Fransa) qarşılaşmasının qalibiylə mübarizə aparacaq. Jalə Əliyeva (57 kq) ilk mərhələdə ukraynalı Aleksandra Xomenetsə müqavimət göstərə bilməyib - 2:13. J.Əliyeva sabah təsəlliverici görüşdə Bolqarıstan təmsilçisi Nazife Tairlə güləşəcək. Birgül Soltanova (65 kq) təsnifat mərhələsində bolqarıstanlı Gergana Stoyanovaya 3:0 hesabıyla qalib gəlib. Millimizin üzvü daha sonra yunanıstanlı Drosula Tzianakopulonu "tuş"la məyus edərək adını yarımfinala yazdırıb. B.Soltanova bu mərhələdə fransalı İris Tiboksdan güclü olub - 6:3. Birgül sabah finalda rumıniyalı Amina Kapezanla qarşılaşacaq.xeber100.com

Şahmatçılar arasında şəxsi Avropa çempionatına start veriləcək

Martın 18-də Monteneqronun Petrovaç şəhərində qadın şahmatçılar arasında şəxsi Avropa çempionatına start veriləcək. Azərbaycan Şahmat Federasiyasından bildirilib ki, 11 turdan ibarət qitə çempionatında 35 ölkə iştirak edəcək. Azərbaycanı qitə çempionatında Günay Məmmədzadə, Ülviyyə Fətəliyeva, Gövhər Beydullayeva, Xanım Balacayeva, Gülnar Məmmədova, Türkan Məmmədyarova, Xəyalə Abdulla, Səbinə İbrahimova, Ayan Allahverdiyeva, Ləman Hacıyeva, Nərmin Abdinova, Mələk İsmayıl, Nazlı Hümbətova və Lalə Hüseynova təmsil edəcək. Avropa çempionatının ümumi mükafat fondu 60 min avro təşkil edir. Qitə çempionatına martın 29-da yekun vurulacaq.xeber100.com

“Mançester Siti” futbol klubu futbolçusu ilə yeni müqavilə imzalayıb

İngiltərənin “Mançester Siti” klubu futbolçusu Xulian Alvareslə yeni müqavilə imzalayıb. Klub xəbər verir ki, argentinalı hücumçunun müqaviləsinin müddəti 2028-ci ilin yayınadək uzadılıb. Qeyd edək ki, ötən ildən Mançester təmsilçisində çıxış edən 23 yaşlı forvard Argentina yığmasının heyətində 2022-ci ildə dünya çempionu olub.xeber100.com

İtaliyanın “Napoli” klubu futbolçusu ilə müqaviləni yeniləyib

İtaliyanın “Napoli” klubu futbolçusu Stanislav Lobotka ilə müqaviləni yeniləyib. Klub xəbər verir ki, slovakiyalı futbolçu ilə 2027-ci il iyunun 30-dək müqavilə imzalanıb. Müqaviləyə əməkdaşlığın daha bir il müddətinə uzadılması variantı da daxil edilib. Yarımmüdafiəçinin “Napoli” ilə əvvəlki müqaviləsi 2025-ci ilin yayınadək idi. Qeyd edək ki, 28 yaşlı futbolçu bu mövsüm “Napoli”nin heyətində bütün yarışlarda 34 oyuna çıxıb, 1 qol vurub, 1 qolun ötürməsini edib.xeber100.com

UEFA Konfrans Liqasında final mərhələsinin cavab matçlarına start verilib

UEFA Konfrans Liqasında səkkizdəbir final mərhələsinin cavab matçlarına start verilib. İlk oyun günündə bir qarşılaşma keçirilib. “Başakşehir” klubu İstanbulda Belçikanın “Gent” komandasını qəbul edib. Görüş Belçika təmsilçisinin 4:1 hesablı qələbəsi ilə başa çatıb. Komandalar arasında ilk görüşdə 1:1 hesablı heç-heçə qeydə alınıb. İki görüşün nəticəsinə görə, “Gent” turnirin dörddəbir final mərhələsinə yüksəlib. “Gent” turnirin pley-off mərhələsində Ağdamın "Qarabağ" klubunu mübarizədən kənarlaşdırıb. Qeyd edək ki, bu mərhələnin digər oyunları martın 16-da keçiriləcək.xeber100.com