“Bakı Marafonu-2017” keçiriləcək

Aprelin 30-da “Bakı Marafonu-2017” keçiriləcək. İkinci dəfə baş tutacaq marafon bu il də “Küləyə qalib gəl” şüarı altında təşkil olunacaq.Fonddan Azərtac-a bildiriblər ki, idmanın inkişafına dəstək göstərmək, sağlam həyat tərzini təbliğ etmək, insanları xeyirxah amallarla bir araya gətirmək məqsədi daşıyan layihənin icrasını isə “Sport Marketing Group” (SMG) şirkəti həyata keçirəcək.“Bakı Marafonu-2017” ötən il olduğu kimi, Dövlət Bayrağı Meydanından start götürərək Bakı Olimpiya Stadionuna qədər 21 kilometr məsafəni əhatə edəcək.Qeyd edək ki, ötən il mayın 1-də təşkil olunan ilk yarımarafonda 7 mindən çox iştirakçı qeydiyyatdan keçmişdi.xeber100.com

Konfederasiyalar Kubokunun iştirakçıları müəyyənləşib

Bu il iyunun 17-dən iyulun 2-dək Rusiyada keçiriləcək futbol üzrə Konfederasiyalar Kubokunun bütün iştirakçıları müəyyənləşib.Azərtac xəbər verir ki, turnirə sonuncu vəsiqəni Afrika Millətlər Kubokunun qalibi olan Kamerun yığması qazanıb. Afrika təmsilçisi turnirdə “B” qrupunda Çili, Almaniya və Avstraliya milliləri ilə mübarizə aparacaq. “A” qrupunda isə meydan sahibi Rusiya, Portuqaliya, Yeni Zelandiya və Meksika yığmaları yer alıb.Konfederasiyalar Kubokunun görüşləri 2018-ci ildə dünya çempionatının qarşılaşmalarına ev sahibliyi edəcək Kazan, Soçi, Sankt-Peterburq və Moskva şəhərlərindəki stadionlarda oynanılacaq.xeber100.com

Tərəfdaşlıq sazişi imzalanıb

Fevralın 6-da BP şirkəti ilə “Bakı-2017” IV İslam Həmrəyliyi Oyunları Əməliyyat Komitəsi arasında tərəfdaşlıq sazişi imzalanıb.Azərtac xəbər verir ki, sazişi gənclər və idman naziri Azad Rəhimov və BP-nin Azərbaycan, Türkiyə və Gürcüstan üzrə regional prezidenti Qordon Birrell imzalayıblar.Bu tərəfdaşlıq BP-nin Azərbaycanda idmanın inkişafına dəstək verməklə bağlı öhdəliyinin bir hissəsidir. Sazişə əsasən, BP “Bakı-2017” IV İslam Həmrəyliyi Oyunlarının rəsmi tərəfdaşı olmaqla yanaşı, oyunlara və sonrakı yarışlara hazırlıq keçən 7 milli idman elçisinə, eləcə də könüllülərə dəstəyini göstərəcək.xeber100.com

Beynəlxalq hakimlik kursları başlayıb

Fevralın 6-da Bakıda kişi idman gimnastikası üzrə beynəlxalq hakimlik kursları başlayıb. Beynəlxalq Gimnastika Federasiyası (FIG) tərəfindən təşkil olunan kurslar fevralın 9-dək davam edəcək.Azərtac xəbər verir ki, kurslarda 17 ölkədən 66 hakim iştirak edir. Azərbaycanı bu kurslarda 6 nəfər təmsil edir. Hakimlikdə ilk addımlarını atan mütəxəssislər bu kurslarda dərəcə qazanmaq imkanı əldə edirlər.Beynəlxalq idman gimnastikası üzrə texniki heyətin rəhbəri Stiv Butçer kursların açılışında təşkilat komitəsinin üzvlərini təqdim edib. Azərbaycan Gimnastika Federasiyasının baş katibi F.Qayıbov qeyd edib ki, idman gimnastikası üzrə beynəlxalq hakimlik kursları artıq ölkəmizdə ikinci dəfə təşkil olunur. İlk belə kurslar 2007-ci ildə keçirilib. Ötən ay isə paytaxtımızda FIG-in qitələrarası hakimlik və bədii gimnastika üzrə beynəlxalq kursları uğurla təşkil edilib. F.Qayıbov bu kursların keçirilməsini Azərbaycana həvalə etdiyi üçün FIG-in texniki komitəsinə minnətdarlığını bildirib.xeber100.com

Afrika Millətlər Kubokunun qalibi müəyyənləşib

Futbol üzrə Afrika Millətlər Kubokunun qalibi müəyyənləşib.TASS xəbər verir ki, Kamerun yığması final oyununda Misir komandasını 2:1 hesabı ilə məğlub edərək Afrika Millətlər Kubokunun qalibi olub. Oyunun 89-cu dəqiqəsində Türkiyənin "Beşiktaş" klubunda çıxış edən Vensan Abubakar qələbə topuna imza atıb.Kamerun yığması tarixdə beşinci dəfə Afrika Kubokunu qazanıb. Komanda sonuncu dəfə 2002-ci ildə bu mükafatın sahibi olub. Komanda hesabında isə Misir yeddi dəfə bu kubokun qalibi olub ki, bu da rekord göstəricidir. Misirlilər sonuncu dəfə 2010-cu ildə Afrika Kuboku qazanıblar.xeber100.com

Bədii gimnastika üzrə dünya çempionatı təşkil ediləcək

2020-ci ildə kişi idman gimnastikası üzrə Avropa çempionatı Bakıda təşkil olunacaq. Bu barədə qərar Avropa Gimnastika İttifaqının Lozannadakı baş qərargahında qurumun İcraiyyə Komitəsinin iclasında qəbul olunub.Azərtac xəbər verir ki, iclasda Azərbaycan Gimnastika Federasiyasının 2020-ci ildə idman gimnastikası üzrə Avropa çempionatının ölkəmizdə keçirilməsi ilə bağlı namizədliyi məsələsinə baxılıb. Müzakirələrdən sonra kişi idman gimnastikası üzrə 34-cü Avropa çempionatının 2020-ci il mayın 6-10-da Bakıda keçirilməsi qərara alınıb. Qadın idman gimnastikası üzrə 33-cü Avropa çempionatının təşkili isə Parisə həvalə olunub.Beynəlxalq Gimnastika Federasiyasının 2017-2020-ci illərdə Olimpiya dövrü üzrə yeni qaydalarına əsasən, Avropa çempionatlarında da “Tokio-2020”yə lisenziya qazanmaq imkanı olacaq.Bundan əlavə, Azərbaycan Gimnastika Federasiyası növbəti Olimpiadaya qədər gimnastikanın üç növü (idman gimnastikası, batut gimnastikası, bədii gimnastika) üzrə məhz lisenziya xarakteri daşıyan dünya kuboku mərhələlərini, həmçinin bədii gimnastika üzrə dünya çempionatını təşkil edəcək.xeber100.com

Taekvando üzrə beynəlxalq turnir keçirilir

İranın Kərəc şəhərində yeniyetmə və uşaqlar arasında taekvando üzrə beynəlxalq turnir keçirilir. İran İslam İnqilabının 38-ci ildönümünə həsr olunan turnirdə Azərbaycanı təmsil edən 7 yeniyetmə idmançımız uğurla mübarizə aparıblar.Turnirin birinci günündə Ramal Əliyev (25 kq) və Ağa İsmayılzadə (27 kq) birinci yeri tutaraq qızıl medallara sahib olublar. Digər çəki dərəcələri üzrə yarışlarda isə Fuad Mirzəyev ikinci, Mirhüseyn Zəkiyev, Azər Eyvazlı, Tarix Əliyev və Poladxan İbrahimov üçüncü yerdə qərarlaşıblar.xeber100.com

Futbol üzrə XVI tura yekun vurulub

Fevralın 4-də futbol üzrə Azərbaycan Premyer Liqasında XVI tura yekun vurulub.Azərtac xəbər verir ki, turun son qarşılaşması Sumqayıtda oynanılıb.Bakının “İnter” klubu “Sumqayıt”la üz-üzə gəlib. Paytaxt təmsilçisi zirvədə qərarlaşan “Qarabağ” və “Qəbələ”dən uzaq düşməməyə, “kimyaçılar” isə hazırda qərarlaşdıqları 4-cü pillədəki mövqelərini itirməməyə cəhd göstəriblər.Oyunda hesabı meydan sahibləri açsa da, Zaur Svanadzenin yetirmələri nəinki hesabı bərabərləşdirmək, həmçinin son dəqiqələrdə hesabda önə də keçiblər. Ancaq komanda oyunu 3 xalla başa vura bilməyib. “Sumqayıt” matça əlavə olunmuş birinci dəqiqədə oyunda status-kvonu bərpa edib - 2:2. Ev sahibi komandadan Mirabdulla Abbasov (18), Nicat Muxtarov (90) və qonaqların heyətində isə İlkin Qırtımov (47), Rauf Əliyev (88) fərqləniblər. Qarşılaşma elə bu hesabla da yekunlaşıb.Bu görüşdən sonra “İnter” 29 xalla 3-cü yerdəki mövqeyini qoruyub. “Sumqayıt” klubu isə 19 xalla turu 5-ci başa vurub.xeber100.com

Beynəlxalq hakimlik kursları keçirilib

Litvanın paytaxtı Vilnüsdə aerobika gimnastikası üzrə beynəlxalq hakimlik kursları keçirilib.Az'rtac xəbər verir ki, seminarda iştirak edən Azərbaycan təmsilçiləri Nigar Abdusəlimova və Aleksandra Qorobçuk imtahanlardan uğurla keçərək dördüncü hakimlik kateqoriyasını əldə ediblər.Bu kateqoriya cari Olimpiya dövründə (2017-2020-ci illər) qüvvədə olacaq.xeber100.com

Qraplinq və MMA idman növləri üzrə çempionat başa çatıb

Hövsan Olimpiya İdman Kompleksində pankration, qraplinq və MMA idman növləri üzrə açıq Bakı çempionatı və birinciliyi başa çatıb.Azərtac xəbər verir ki, gərgin idman mübarizəsi şəraitində keçən yarışa 300-dən çox atlet qatılıb.“Neftçi İdman Klubu”nun təmsilçiləri çempionatda aşkar üstünlükləri ilə seçiliblər və ümumilikdə yarışın 29 medalına (8 qızıl, 6 gümüş, 15 bürünc) sahib olublar.Qraplinq yarışlarında İmran Abbasquliyev (16-17 yaş, 58 kq), Coşqun Dəlişov (20 yaşdan yuxarı, 62 kq), Teymurşah Cəmaləddinov (20 yaşdan yuxarı, 71 kq) və Həzi Həsənov (20 yaşdan yuxarı, 92 kq) əzmlə mübarizə apararaq qalib adını qazanıblar.MMA idman növündə iyirmi yaşdan yuxarı idmançılar arasında Coşqun Dərişov (71 kq), Nemət Məmmədov (77 kq) və Əli Əlizadə (100 kq) rəqib tanımayaraq liderliyə yüksəliblər.Pankrationçuların mübarizəsində isə Rasim Abdulrəhmanov (14-15 yaş, 73 kq) bütün döyüşlərdən qalib ayrılıb və paytaxt birinciliyinin qızıl medalına yiyələnib.“Neftçi İdman Klubu” ümumi komanda hesabında birinci yeri tutub.xeber100.com