Bu gün Beynəlxalq Şən və Hazırcavablar Klubu günüdür

Bu gün Beynəlxalq ŞHK (“Şən və Hazırcavablar Klubu”) günüdür. Bu, ŞHK komandalarına hər hansı şəkildə aidiyyəti olan hər kəs üçün bayramdır. Bu il ŞHK 55 yaşını qeyd edir. Bu münasibətlə noyabrın 12-də Moskvanın əsas teatr-konsert məkanı olan Dövlət Kreml Sarayında müasir ŞHK komandalarının ən yaxşılarının iştirakı ilə böyük bayram konserti olacaq. Aleksandr Maslyakovun dəvəti ilə bu bayramda Azərbaycanı iki komanda - əfsanəvi “Parni iz Baku” və “Sbornaya Baku” komandasının gənc ulduzları təmsil edəcəklər. Bizim “KVN”çilər bu böyük tədbirdə iştirak etməyə hazırlaşmaq üçün Moskvadadırlar. Azərbaycan ŞHK liqasının rəhbəri Rəşad Əzizov Azərtac-a müsahibəsində deyib: “Bu, ŞHK tarixində ən genişmiqyaslı tədbirlərdən biridir. Təsadüfi deyildir ki, təntənəli yubiley şənliyi ilk dəfə məhz Kremldə keçiriləcək, bu tədbirə yüksəkvəzifəli şəxslər tamaşa edəcəklər".xeber100.com

Türkdilli dövlətlərin mədəniyyət festivalının açılış mərasimi olub

Noyabrın 8-də Koreya Respublikasının paytaxtı Seulda türkdilli dövlətlərin mədəniyyət festivalının açılış mərasimi olub. Azərbaycanın Koreya Respublikasındakı səfirliyinin təşəbbüsü və Koreya Xarici İşlər Nazirliyinin təşkilatçılığı ilə keçirilən festivalda Azərbaycan, Türkiyə, Qazaxıstan, Qırğızıstan və Türkmənistan təmsil olunur. Koreya Milli Muzeyində keçirilən açılış mərasimində çıxış edən Xarici İşlər Nazirliyinin ictimai diplomatiya üzrə səfiri Ço Hyun-donq bu cür festivalların Koreyada türkdilli ölkələrin daha yaxşı tanıdılması və qarşılıqlı mədəniyyət mübadiləsi baxımından əhəmiyyətini vurğulayıb. O, koreyalıların və türkdilli millətlərin dillərində, folklorunda, adət-ənənələrində bənzərliklərin olduğunu vurğulayaraq, xalqlarımız arasında mədəni mübadilənin tarixinin qədim olduğunu deyib. Mərasimdə çıxış edən ölkəmizin Koreya Respublikasındakı səfiri Rəmzi Teymurov deyib ki, Azərbaycan tərəfinin iki il əvvəl belə bir festivalın keçirilməsi ilə bağlı irəli sürdüyü təşəbbüsün keçmiş sovet respublikaları, o cümlədən Azərbaycanın müstəqilliyinin 25-ci ildönümündə reallaşması sevindirici haldır. O, əmin olduğunu bildirib ki, mədəni mübadilə ölkələrimiz arasında digər sahələrdə də əlaqələrin dərinləşməsinə imkan yaradacaq.xeber100.com

“Yeddi gözəl” baletinə həsr olunmuş gecə keçirilib

Azərbaycanın Los-Ancelesdəki baş konsulluğunda milli incəsənət irsimizin ən dəyərli nümunələrindən olan “Yeddi gözəl” baletinə həsr olunmuş gecə keçirilib. Gecədə “Yeddi gözəl” baletinin  2014-cü ildə Kaliforniyanın San-Dieqo şəhərində uğurla keçən və 3 min tamaşaçının izlədiyi Amerika premyerasının videoyazısı nümayiş etdirilib. Konsulluqdan Azərtac-a bildirilib ki, tədbirdə ABŞ-ın ən nüfuzlu tibb ocaqlarından olan, Los-Ancelesdə yerləşən Cedars-Sinai Tibb Mərkəzinin “Bir ürək xilas et” fondunun üzvləri, sənətsevərlər, eləcə də kimya üzrə Nobel mükafatçısı Arye Vorşel iştirak edib.xeber100.com

“İşğaldakı sərvətimiz” mövzusunda rəsm sərgisi keçiriləcək

Dekabrın 3-də Azərbaycan Rəssamlar İttifaqının təşkilatçılığı ilə “İşğaldakı sərvətimiz” mövzusunda rəsm sərgisi keçiriləcək. Qeyd edək ki, layihə çərçivəsində 17-29 yaş qrupunda gənc rəssamların əsərlərindən ibarət sərgi təşkil olunacaq. Sərgidə Qarabağda düşmən təcavüzü nəticəsində məhv edilmiş milli mədəni irsimiz, tarixi abidələrimiz, habelə təbii sərvətlərimizi əks etdirən rəsm əsərlərinin nümayişi nəzərdə tutulur.xeber100.com

Mədəniyyət və Turizm Baş İdarəsinin dəstəyi ilə…

Bakı Şəhər Mədəniyyət və Turizm Baş İdarəsinin dəstəyi ilə Mərdəkan Mədəniyyət Sarayında Azərbaycan-Gürcüstan folklor festivalı keçirilib.İdarədən Azərtac-a bildirilib ki, festivalın əsas məqsədi ölkələrin mədəniyyətlərini nümayiş etdirmək və rəqs kollektivlərinin dostluq bağlantılarının daha da möhkəmlənməsinə vasitəçi olmaqdır.Tədbirdə Gürcüstanın “Aisi”, "XXI əsr” rəqs kollektivləri ilə yanaşı, Mərdəkan Mədəniyyət Sarayının “Lalələr”, “Azərbaycan qartalları” rəqs kollektivləri və solistlər çıxış ediblər.Sonda festival iştirakçıları diplomla təltif olunub.

144-cü teatr mövsümünün ilk premyerası olub

Azərbaycan Dövlət Akademik Milli Dram Teatrında 144-cü teatr mövsümünün yeni səhnə əsəri - “Vəsiyyət” tamaşasının premyerası olub. Azərtac xəbər verir ki, tamaşa yazıçı, dramaturq Hüseynbala Mirələmovun “Axirətdən gələn zəng” pyesi əsasında səhnələşdirilib. İki hissəli komediyanın quruluşçu rejissoru Əməkdar Artist Firudin Məhərrəmov, rejissoru Əlif Cahangirli, quruluşçu rəssamı Xalq Rəssamı Nazim Bəykişiyev, musiqi tərtibatçısı Kamil İsmayılovdur. Səhnə əsərində əməkdar artistlər Abbas Qəhrəmanov, Mirzə Ağabəyli, Münəvvər Əliyeva, Almaz Amanova, Aslan Şirin, Sevinc Əliyeva, Kazım Həsənquliyev və başqaları çıxış edirlər.xeber100.com  

IV Bakı Beynəlxalq Teatr Konfransı işə başlayıb

Noyabrın 7-də paytaxtımızda “Multikulturalizm və teatr” mövzusunda IV Bakı Beynəlxalq Teatr Konfransı işə başlayıb. Konfrans Mədəniyyət və Turizm Nazirliyinin təşkilatçılığı ilə reallaşıb. Konfransda 38 ölkədən 150-yə yaxın teatr xadimi, dramaturq, teatr və teatrla bağlı beynəlxalq institutların rəhbərləri iştirak edirlər. Tədbirin əsas məqsədlərindən biri iştirakçıları ölkəmizdə mövcud olan mədəni platforma ilə tanış etməkdir.xeber100.com

Musiqili Teatrda seminar-mühazirə təşkil olunub

Noyabrın 6-da Azərbaycan Dövlət Musiqili Teatrında “Teatr teatrşünasdan nə gözləyir” adlı seminar-mühazirə təşkil olunub. Azərtac xəbər verir ki, bir sıra teatr xadimlərinin də qatıldığı seminar-mühazirə Rusiyanın tanınmış teatrşünası Pavel Rudnevin rəhbərliyi ilə aparılıb. Seminarda teatrlar üçün müasir dövrdə yaranmış problemlərin həlli yolları, dünyanın qabaqcıl teatrları arasında qarşılıqlı əməkdaşlıq prinsiplərinə ciddi əməl olunması, teatrlarda texniki imkanların yaradılması üçün həyata keçirilən işlər və digər mövzularda mühazirələr dinlənilib. Tədbirdə teatrların və teatrşünaslığın təbliği yönündə vacib addımların atılmasının zəruriliyi qeyd olunub. Bildirilib ki, sosial şəbəkələr və teatrlar arasında əlaqə yaratmaq hər iki tərəf üçün maraqlı olmalıdır. Teatrın təbliğində sosial şəbəkələrin imkanlarından geniş istifadə edilməlidir. Daha sonra rusiyalı qonaq teatrşünasların suallarını cavablandırıb.xeber100.com

Bu gün radio və televiziya işçilərinin peşə bayramı günüdür

Noyabrın 6-sı Azərbaycanda radio və televiziya işçilərinin peşə bayramı günüdür. 1926-cı il noyabrın 6-da Azərbaycanda ilk dəfə radio verilişlərinin yayımına başlanılıb. Həmin gün ölkə paytaxtının küçələri və meydanlarında qurulmuş reproduktorlardan ilk dəfə “Danışır Bakı” ifadəsi yayılıb. Bu hadisə o vaxt Azərbaycan xalqının siyasi və mədəni həyatında böyük bir yenilik idi. Azərbaycan Televiziyası yaranandan sonra isə bu tarix təkcə radionun deyil, teleradionun yaranma günü kimi qeyd olunmağa başlayıb. Bakı Televiziya Studiyası ilk dəfə 1956-cı il fevralın 14-də efirə çıxıb. İlk veriliş günü ekranda mərhum sənətkarımız Nəcibə Məlikova görünüb və o, çıxışına “Göstərir Bakı” sözləri ilə başlayıb. Həmin gün televiziyada “Bəxtiyar” bədii filmi nümayiş etdirilib.xeber100.com

“Qardaş türk xalqlarını tanıyaq” devizi altında…

Noyabrın 8-də Bakı Xətai Sənət Mərkəzində “Qardaş türk xalqlarını tanıyaq” devizi altında “Özbəkistan Azərbaycan uşaqlarının gözü ilə” adlı sərgi açılacaq. Azərtac xəbər verir ki, sərgi Mədəniyyət və Turizm Nazirliyi, Dövlət Rəsm Qalereyası, Özbəkistandakı səfirliyimizin Heydər Əliyev adına Azərbaycan Mədəniyyət Mərkəzi və Xətai Sənət Mərkəzinin birgə təşkilatçılığı ilə gerçəkləşəcək. Sərginin təşkil olunmasında məqsəd azərbaycanlı uşaqların qardaş özbək xalqının adət-ənənəsi, tarixi, mədəniyyəti, mətbəxi, həyat tərzi, insanlarının xarakteri və geyim mədəniyyətini necə görmələrini öz fırçaları ilə canlandırmaq, onlarda bu haqda maraq yaratmaqdan ibarətdir. Balaca fırça ustalarının əl işlərinin nümayiş olunacağı sərgidə hər kəs iştirak edə bilər.xeber100.com