Qanvermə aksiyası keçirilib

Aprelin 18-də Azərbaycan Dövlət Neft və Sənaye Universitetinin (ADNSU) poliklinika şöbəsində talassemiya və hemofiliyadan əziyyət çəkən insanlara yardım məqsədilə könüllü qanvermə aksiyası keçirilib.Universitetdən Azərtac-a bildiriblər ki, qanvermədə ADNSU-nun müəllim və işçi heyəti ilə yanaşı, tələbələr də könüllü iştirak edib, qana ehtiyacı olan insanlara kömək üçün bu humanist aksiyaya qoşulublar. Bahadır Eyvazov adına Elmi-Tədqiqat Hemotologiya və Transfiziologiya İnstitutunun Mərkəzi Qan Bankı tərəfindən ezam olunan xüsusi tibb briqadası tərəfindən hər bir donorun sağlamlığı yerindəcə müayinə edilib və onlardan qan analizi götürülərək sağlam olub-olmamaları müəyyənləşdirilib. Yığılan qan ehtiyatı yoxlanılaraq talassemiya, hemofiliya və digər qan xəstəliklərindən əziyyət çəkənlər üçün saxlanılıb.xeber100.com

Bakı Sağlamlıq Mərkəzində xüsusi komissiya yaradılıb

Xəbər verildiyi kimi, səhiyyə nazirinin “2017-ci ildə Bakı şəhərində keçiriləcək IV İslam Həmrəyliyi Oyunlarının tibbi təminatı barədə” imzaladığı əmrə əsasən yarış iştirakçıları və qonaqlara tibbi yardım göstərilməsi üçün ayrılan müəssisələrdən biri Bakı Sağlamlıq Mərkəzidir. Mərkəzdə İslam Oyunlarına tibbi yardım göstərilməsi ilə əlaqədar aparılan hazırlıq işləri son mərhələdədir.Bakı Sağlamlıq Mərkəzində bu məqsədlə xüsusi komissiya yaradılıb. Komissiyanın tərkibinə xəstəxananın baş həkimi və baş həkimin dörd müavini, şöbə müdirləri olmaqla 11 nəfər daxildir. Komissiyanın sədri, Mərkəzin baş həkimi, tibb elmləri namizədi Hikmət Həsənov hazırlığın gedişi barədə Azərtac-ın müxbirinə məlumat verərək deyib: ”Sağlamlıq Mərkəzinin 6-cı mərtəbəsi xüsusi olaraq İslam Həmrəyliyi Oyunları ilə əlaqədar müraciətlər üçün ayrılıb. Cərrahiyyə, ümumi terapiya, nevrologiya, endokrinologiya, mamalıq və burun-qulaq-boğaz şöbələrində 9 palata hazır vəziyyətə gətirilib. Lazım gəlsə, ümumi cərrahiyyə şöbəsinin tərkibinə daxil olan tarakal cərrahiyyə də iştirakçılara xidmət göstərəcək. Lakin bundan başqa ehtiyat üçün əlavə olaraq hər şöbədə daha 5 çarpayı ayrılması da nəzərdə tutulub. Tədbir iştirakçıları və qonaqlara rentgen, ultrasəs, KT müayinələri göstərilməsi üçün hər cür şərait yaradılıb, reanimasiya otağı və laboratoriya da tibbi yardım göstərmək üçün tam hazırdır. Tam hazırlıq vəziyyətə gətirilməyən yeganə MRT müayinəsidir. Həmin müayinələrin aparılması üçün aparat yeni alınıb, tam hazırlıq keçmiş mütəxəssis də var. Lakin yeni aparat hələ işə salınmayıb. İndi onu işə salınması üçün mütəxəssislərin gəlişini gözləyirik. Güman edirəm ki, yaxın bir-iki gün ərzində həmin proses başa çatdırılandan sonra Bakı Sağlamlıq Mərkəzinin IV İslam Həmrəyliyi Oyunların tam hazırlığı barədə danışmaq olar".xeber100.com  

Bu gün Ümumdünya Hemofiliya Günüdür

Dünya Səhiyyə Təşkilatının və Dünya Hemofiliya Federasiyasının təşəbbüsü ilə aprelin 17-si “Ümumdünya Hemofiliya Günü” elan edilib. Bu günün təsis edilməsinin və qeyd olunmasının məqsədi qanın laxtalanması prosesinin pozulması ilə əlaqədar irsi xəstəlik olan hemofiliyadan əziyyət çəkən insanların hər gün üzləşdiyi problemlərə dünya ictimaiyyətinin, siyasətçilərin və səhiyyə işçilərinin diqqətini cəlb etmək, bu barədə onların məlumatını artırmaqdır.Hemofiliya gününün tarixi heç də təsadüfən seçilməyib. Bu, Dünya Hemofiliya Federasiyasını yaratmış Frenk Şnaybelə hörmət əlamətidir. Şnaybel məhz aprelin 17-də doğulub.Qanın laxtalanması prosesinin pozulması ilə əlaqədar irsi xəstəlik olan hemofiliya X xromosomunda cəmi bir genin konfiqurasiyasının dəyişməsi səbəbindən yaranır. Xəstəliyin simptomları demək olar ki, bütün hallarda erkən uşaqlıq dövründə, çox vaxt körpənin həyatının 4-5-ci gününə qədər özünü göstərir.Bu gün hemofiliyanın müalicəsi yoxdur, lakin pasiyentin orqanizmində çatışmayan qanın laxtalanması amilinin inyeksiya edilməsi yolu ilə bu xəstəliyin gedişinə tamamilə və uğurlu şəkildə nəzarət edilir. Bu məqsədlə istifadə edilən laxtalanma amili əksər hallarda donor qanından götürülür.xeber100.com

Ümumdünya Səhiyyə Təşkilatının metodologiyası əsasında…

Ölkəmizdə ilk dəfə olaraq, pilot layihə çərçivəsində “Məktəbli uşaqlar arasında sağlam vərdişlərin tədqiqi” ilə bağlı sorğu aparılır. Ümumdünya Səhiyyə Təşkilatının metodologiyası əsasında ölkəmizin məktəbli mühitinə uyğunlaşdırılmış Azərbaycan və rus dillərində hazırlanan 60-dan çox sualdan ibarət anketlər şagirdlərə paylanılıb.Azərtac İctimai Səhiyyə və İslahatlar Mərkəzinin mətbuat xidmətinə istinadla xəbər verir ki, mərkəz Təhsil Nazirliyinin dəstəyi ilə Bakı şəhəri və Xızı rayonunda tam orta məktəblərin V, VII və IX sinif şagirdləri arasında keçirilən sorğuya yekun vurub.Sorğudan ilkin olaraq bir sıra maraqlı nəticələr əldə olunub. 1350 şagirdin iştirakı ilə keçirilməsi nəzərdə tutulan sorğu tamamlanandan sonra əldə edilən məlumatlar xüsusi olaraq IBM şirkətinin SPSS kompüter proqramı vasitəsilə aprelin axırlarında təhlil ediləcək və nəticələr əsasında hesabat hazırlanacaq. Sorğunun nəticələri Səhiyyə və Təhsil Nazirlikləri, müvafiq dövlət qurumları, mətbuat nümayəndələri və mütəxəssislərin iştirakı ilə bu ilin mayında geniş müzakirə olunacaq, verilən təklif və tövsiyələr nəzərdən keçiriləcək.Növbəti sorğu Sumqayıt şəhər məktəblərində aparılacaq.xeber100.com

Uşaq psixi sağlamlıq və inkişaf mərkəzi açılıb

Uşaqlar arasında inkişaf problemləri və autizm spektr pozulmalarının rastgəlmə tezliyinin artmasını və bu xəstəliyin erkən diaqnostikası son illər həmin məsələyə yeni münasibət tələb edir. Bunu nəzərə alaraq, Tibb Universitetinin Tədris Terapevtik Klinikasında Uşaq sağlamlıq və inkişaf mərkəzi açılıb. Bu barədə universitetin mətbuat xidmətindən Azərtac-a xəbər verilib.Mərkəzin rəhbəri N.Sədiyeva fəaliyyətlərinin təkcə klinik deyil, elmi və tədris sahədə də olacağını bildirib: “Mərkəzdə uşaqların inkişaf problemləri, pediatrik və psixi xəstəliklərin erkən diaqnostikası və müalicəsi həyata keçirilir. Mərkəz ölkədə xüsusilə, neyroinkişaf problemlərinə multidisiplinar yanaşmanı təmin etməyi qarşıya məqsəd qoyur və tədris prosesi ilə yanaşı, elmi əsaslar üzərində fəaliyyət göstərməyi, digər ölkələrdəki analoji mərkəzlərlə əməkdaşlıq edəcək və beynəlxalq təcrübənin qabaqcıl nümunələrini tətbiq edəcək”.xeber100.com

Əhalinin tibbi müayinədən keçirilməsi ilə bağlı tədbirlər planı davam edir

Əhalinin icbari tibbi müayinədən keçirilməsi ilə bağlı tədbirlər planı uğurla icra olunur. Əhalinin sağlamlığının qorunmasına yönələn bu tədbirin keçirilməsi üçün rayonda xüsusi komissiya yaradılıb. Əhali arasında aşkar edilən xəstələr dispanser müşahidəsinə götürülür və müalicəyə cəlb edilirlər.Azərtac xəbər verir ki, Binəqədi Rayon İcra Hakimiyyəti aksiyanın səmərəliliyini artırmaq üçün əhali arasında təbliğat işi həyata keçirir. Bu məqsədlə yaşayış evlərinin girişlərinə elan lövhələri yerləşdirilir. Rayon icra hakimiyyətində “Qaynar xətt” yaradılıb.Binəqədi rayonundakı 6 nömrəli Birləşmiş Şəhər Xəstəxanasında bu günə kimi 10 mindən çox sakin müayinədən keçib. Xəstəxananın poliklinika şöbəsinin müdiri İsa Cahanovun sözlərinə görə, səhiyyə ocağı 3 il əvvəl əsaslı təmir olunub və hər cür lazımi avadanlıq və preparatlarla tam təchiz edilib və burada yüksək ixtisaslı tibbi personal xidmət göstərir. Müayinə zamanı xəstəlik aşkar edilən 267 şəxs qeydiyyata alınıb, 57 nəfər isə stasionar müalicəyə cəlb olunub. Hazırda rayonda müayinə davam etdirilir və tədbir uyğun qrafiklə həyata keçirilir.xeber100.com

“PLOS Medicine” nəşri yazır…

Çin və Britaniya həkimləri təzə meyvə yeməklə diabetin inkişaf riskinin və bu xəstəliklə bağlı ağırlaşmaların azalması arasında əlaqəni aşkar edən tədqiqat aparıblar. Onlar tədqiqatın nəticələrini “PLOS Medicine” nəşrində dərc ediblər. Alimlərin gəldiyi qənaət bundan ibarətdir ki, adamlar nə qədər çox meyvə yeyiblərsə, bir o qədər də az diabetə tutulublar. Məsələn, rasionunda təzə meyvə olan adamlarda diabet olmaq riski 12 faiz azalıb. Diabetdən əziyyət çəkən və meyvə yeyən xəstələrdə isə ölüm ehtimalı 13-28 faiz azalıb.Alimlərin fikrincə, indiyə qədər heç kəs təzə ərzaq məhsullarından istifadə edilməsi ilə diabet arasında qarşılıqlı əlaqəni tədqiq etməyib. İlk dədə onlar müvafiq məsələni araşdırıblar. Tədqiqata Çinin 500 mindən çox sakini cəlb edilib.xeber100.com

Milli Məclisin səhiyyə komitəsinin iclası keçirilir

Aprelin 12-də Milli Məclisin səhiyyə komitəsinin iclası keçirilir.Azərtac xəbər verir ki, komitənin sədri Əhliman Əmiraslanov iclas iştirakçılarına gündəlikdəki məsələlər barədə məlumat verib.İclasda "Dərman vasitələri haqqında", "Yeyinti məhsulları haqqında", "Reklam haqqında" qanunlarda və İnzibati Xətalar Məcəlləsində dəyişikliklər edilməsi barəsində qanun layihələri müzakirəyə olunur.xeber100.com

Bu gün Ümumdünya Parkinson Xəstəliyinə qarşı Mübarizə Günüdür

Aprelin 11-də - Parkinson xəstəliyinin ilk tədqiqatçısı, ingilis alimi Ceyms Parkinsonun doğum günündə Ümumdünya Parkinson Xəstəliyinə qarşı Mübarizə günü qeyd edilir. Parkinson xəstəliyi mərkəzi sinir sisteminin xroniki şiddətlənən xəstəliyidir. O, ilk dəfə XIX əsrin əvvəlində ingilis həkimi C.Parkinson tərəfindən “titrəyən iflic” kimi təsvir edilib.Əllərin titrəməsi, hərəkətlərin ləngiməsi, sərbəstlikdən məhrum olma, ağrılar, hərəkət dinamikası və psixikanın pozulması bu xəstəliyin əsas əlamətləridir. Xəstəlik əlilliyə səbəb olur, lakin insanın şüuru pozulmur. Son illər planet əhalisinin qocalması – cəmiyyətin strukturunda qocaların sayının artması ilə bağlı olaraq Parkinson xəstəliyi əsl sosial problemə çevrilib. Xəstələnənlərin sayı durmadan artır, xəstəlik cavanlaşır – 30-40 yaş arasında pasiyentlərin sayı çoxalır. Bu xəstəliyin öyrənilməsi sahəsində qazanılan uğurlara baxmayaraq, təbabət Parkinson xəstəliyinin kifayət qədər səmərəli müalicə metoduna malik deyil.Dünyada təxminən 4 milyon insan bu xəstəlikdən əziyyət çəkir.Ümumdünya Parkinson Xəstəliyinə qarşı Mübarizə Gününün rəmzi qırmızı zanbaqdır. Seleksiyaçılar hətta “Doktor Ceyms Parkinson” xüsusi zanbaq növü yaradıblar.xeber100.com

Nəzəri və praktiki təkmilləşdirmə kursu öz işinə başlayıb

"Anadangəlmə ürək qüsurlarının antenatal və neonatal dövrdə diaqnostikasında exokardioqrafiyanın əsasları. Yenidoğulmuşlarda və körpələrdə EXOKQ-nın aparılmasına dair praktikum" mövzusunda iki mərhələdən ibarət 20 günlük nəzəri və praktiki təkmilləşdirmə kursu öz işinə başlayıb.Səhiyyə Nazirliyinin mətbuat xidmətindən Azərtac-a verilən məlumata görə, Səhiyyə Nazirliyinin, Ə.Əliyev adına Azərbaycan Həkimləri Təkmilləşdirmə İnstitutunun kardiologiya və pediatriya kafedralarının, Elmi-Tədqiqat Pediatriya İnstitutunun, Səhiyyə Nazirliyinin İctimai Səhiyyə və İslahatlar Mərkəzinin, Respublika Uşaq Xəstəxanası və Rostropoviç-Vişnevskaya Fondunun dəstəyi və təşkilatçılığı ilə keçirilən kurslar pediatrik və neonatal kardioloq, pediatrik reanimatoloq, exokardioqrafiya ilə maraqlanan pediatr və neonatoloq, habelə neonatal və pediatrik kardiologiyaya dair biliklərini təkmilləşdirmək istəyən kardiocərrahlar və kardiologiya ixtisası üzrə təhsil alan sonuncu kurs rezidentləri üçün nəzərdə tutulub.xeber100.com